مغربی بنگال: ہوڑہ میں آتش بازی کے دوران لگی گھر میں آگ، 3 بچوں کی دردناک موت، 2 کی حالت نازک

مغربی بنگال کے ہوڑہ میں دیوالی کے موقع پر آتش بازی سے ایک بڑا حادثہ ہو گیا۔ یہاں اُلوبیریا علاقہ میں پٹاخہ جلانے کے دوران آگ لگ گئی جس نے دیکھتے ہی دیکھتے پورے گھر کو اپنی زد میں لے لیا۔ اس دوران وہاں موجود تین معصوم بچوں کی آگ میں جھلس کر دردناک موت ہوگئی۔ حادثہ میں ایک خاتون اور ایک بچہ کے بھی زخمی ہونے کی خبر ہے۔ بتایا ہے کہ آگ نے پاس کی ایک دکان کو بھی اپنی لپیٹ میں لے لیا تھا۔ فائربریگیڈ کی ٹیم نے موقع پر پہنچ کر آگ پر قابو پایا لیکن تب تک 3 بچے بُری طرح جھلس چکے جس سے ان کی موت ہو گئی۔

ایک افسر نے اس سلسلے میں جانکاری دیتے ہوئے بتایا کہ یہ حادثہ اُلوبیریا میونسپلٹی کے وارڈ نمبر 27 کا ہے۔ حادثہ کے دوران اسی علاقے کے کچھ بچے پٹاخے جلا رہے تھے۔ اسی اثنا میں ایک پٹاخہ کی چنگاری قریب میں رکھے پٹاخوں پر گر گئی جس سے آگ لگ گئی۔ آگ بہت تیزی سے پھیلی اور اس نے ایک گھر کو پوری طرح اپنی لپیٹ میں لے لیا۔ افسر نے آگے بتایا کہ اس آگ میں زخمی ہوئے بچوں کو فوراً اُلوبیریا میڈیکل کالج اور اسپتال لے جایا گیا جہاں انہیں مردہ قرار دے دیا گیا۔ حادثہ میں زخمی ہوئے دیگر دو کی حالت سنگین بنی ہوئی ہے جن کا علاج چل رہا ہے۔

وہیں اس معاملے پر فائر بریگیڈ کے افسر نے بتایا کہ اطلاع ملنے کے بعد فائر بریگیڈ ٹیم کی دو گاڑیاں فوراً جائے حادثہ پر بھیجی گئیں۔ کافی مشقت کے بعد آگ پر قابو پایا گیا۔ انہوں جانکاری دی کہ تینوں مہلوکین کی شناخت تانیا مستری، ایشان دھارا اور ممتاز خاتون کے طور پر ہوئی ہے۔ افسر کے مطابق جس گھر میں آگ لگی تھی وہ کاجل شیخ نام کی ایک خاتون کا تھا، مرنے والے تینوں بچوں میں سے ایک ان کے ہی کنبہ کا تھا جبکہ باقی بچے پڑوسی تھے۔