موسم کا حال: دہلی-این سی آر میں سیاہ بادلوں کے ساتھ موسلا دھار بارش

نئی دہلی: دہلی اور اس کے آس پاس کے علاقوں میں تیز ہواؤں کے ساتھ موسلادھار بارش نے موسم خوشگوار بنا دیا ہے۔ گزشتہ دو دنوں کی گرمی کے بعد آج یعنی 15 ستمبر کو صبح تقریباً 7 بجے آسمان پر گہرے بادل چھائے ہوئے تھے اور دہلی، نوئیڈا، غازی آباد سمیت آس پاس کے کئی علاقوں میں اندھیرا چھا گیا۔ کچھ ہی دیر میں سیاہ بادل موسلا دھار بارش میں بدل گئے۔ کئی علاقوں میں ہلکی اور کئی علاقوں میں بھاری بارش ہوئی۔ محکمہ موسمیات نے آج دہلی سمیت کئی علاقوں میں تیز ہواؤں کے ساتھ بھاری بارش کی پیش گوئی کی ہے۔

محکمہ موسمیات کے مطابق، دہلی-این سی آر میں آج صبح 9:30 بجے تک شمال مغربی اتر پردیش سے آنے والے بادلوں کی وجہ سے 50-70 کلومیٹر فی گھنٹہ کی رفتار سے تیز ہواؤں کے ساتھ ہلکی بارش ہونے کا امکان ہے۔ جس کے بعد تیز ہواؤں اور بارش کا دورانیہ بتدریج کم ہو جائے گا۔

آئی ایم ڈی کی پیش گوئی کے مطابق پوری دہلی اور این سی آر کے ملحقہ علاقوں (لونی دیہات، ہندن اے ایف اسٹیشن، غازی آباد، اندرا پورم، چھپرولا، نوئیڈا، دادری، گریٹر نوئیڈا، گروگرام، فرید آباد، مانیسر، بلبھ گڑھ) میں ہلکی سے درمیانی شدت کی بارش ہوگی۔ کچھ مقامات پر تیز بارش اور 50-70 کلومیٹر فی گھنٹہ کی رفتار سے تیز ہوائیں چلیں گی۔ اس کے علاوہ گنور، سونی پت، کھرکھوداا (ہریانہ)، ساکوتی ٹانڈہ، ہستینا پور، بڑوت، میرٹھ، مودی نگر، پلاکھوا، ہاپوڑ، دورالا، باغپت، کھیکڑا (اتر پردیش) میں بھی 50-70 کلومیٹر کی رفتار سے تیز ہواؤںن کے ساستھ درمیانی شدت کی بارش ہوگی۔

اتر پردیش کے شاملی، مظفر نگر، کاندھلا، کھتولی، چاند پور، کٹھور، گڑھ مکتیشور، گلاوٹھی، سکندرآباد کے آس پاس کے علاقوں میں بھی آج ہلکی سے درمیانی شدت کی بارش ہوگی۔

تازہ بارش کی وجہ سے دہلی-این سی آر کے درجہ حرارت میں بھی کمی آئی ہے۔ محکمہ موسمیات کی طرف سے دی گئی معلومات کے مطابق نئی دہلی میں ہفتہ کو بھی ہلکی بارش ہو سکتی ہے۔ اس کے ساتھ ہی اتوار کو بارش کی شدت میں کمی ریکارڈ کی جا سکتی ہے۔ ہفتہ کو یہاں کم سے کم درجہ حرارت 27 ڈگری اور زیادہ سے زیادہ 35 ڈگری ریکارڈ کیا جا سکتا ہے۔ جبکہ اتوار کو کم سے کم درجہ حرارت 27 ڈگری اور زیادہ سے زیادہ 34 ڈگری ریکارڈ کیا جا سکتا ہے۔