موسم کا حال: دہلی، پنجاب، ہریانہ سے لے کر مدھیہ پردیش تک کڑاکے کی سردی جاری

نئی دہلی: پورے شمالی ہندوستان میں شدید سردی کا زور جاری ہے۔ ملک کی راجدھانی دہلی سمیت ہریانہ، اتر پردیش، بہار، پنجاب، راجستھان کے کئی شہروں میں سردی کے ساتھ شدید دھند بھی دیکھی جا رہی ہے۔ محکمہ موسمیات کے مطابق اس ہفتے وسطی اور مشرقی اتر پردیش کے علاوہ مدھیہ پردیش میں ہلکی بارش کے امکانات ہیں۔

موسم کی پیش گوئی کرنے والے ادارے اسکائی میٹ کے مطابق بحیرہ عرب میں کم دباؤ کا علاقہ ہے۔ اس کے علاوہ شمال مشرقی بہار پر طوفانی ہواؤں کا ایک علاقہ بنا ہوا ہے۔ ہریانہ کے آس پاس کے علاقوں میں بھی سائیکلونک ہواؤں کا ایسا ہی علاقہ بن گیا ہے۔ وہیں، ایک ٹرف لائن یوپی کے وسطی حصوں سے جنوب مغربی مدھیہ پردیش کی نچلی سطح تک پھیلی ہوئی ہے۔

پنجاب، راجستھان، ہریانہ اور شمالی مدھیہ پردیش کے کئی مقامات پر سرد دن سے لے کر شدید سرد دن کے حالات ہیں۔ اس کے ساتھ ہی دہلی اور یوپی کے کچھ علاقوں میں شدید دھند چھائی ہوئی ہے۔ جموں و کشمیر، لداخ، ہماچل پردیش اور اتراکھنڈ کے اونچائی والے علاقوں میں برف باری یا بارش کی پیش گوئی کی گئی ہے۔ آئی ایم ڈی نے کہا ہے کہ جنوری میں ان ریاستوں اور مرکز کے زیر انتظام علاقوں میں برف باری ہو سکتی ہے۔

دہلی کے موسم کی بات کریں تو آئی ایم ڈی کے مطابق یہاں ایک ہفتے سے سردی کی لہر جاری ہے، جس کی وجہ سے دارالحکومت میں سردی بڑھ گئی ہے۔ صبح اور شام کے وقت دھند کا راج نظر آتا ہے۔ جس کی وجہ سے حد نگاہ 25 سے 200 میٹر تک رہ جاری ہے۔ دھند کے باعث آئے روز ٹرینیں اور پروازیں بھی متاثر ہو رہی ہیں۔

دہلی کا کم سے کم درجہ حرارت 7 سے 8 ڈگری سیلسیس اور زیادہ سے زیادہ درجہ حرارت 17 سے 19 ڈگری سیلسیس پر برقرار ہے۔ دارالحکومت میں ہفتہ بھر دھند چھائی رہے گی۔ اس کے علاوہ 9 جنوری کو بارش متوقع ہے۔