موسم کا حال: کئی ریاستوں کو شدید گرمی کی لہر کا سامنا، درجہ حرارت 47 ڈگری سیلسیس سے متجاوز

نئی دہلی: ملک بھر کی ریاستوں میں موسم کے کئی رنگ نظر آ رہے ہیں۔ ایک طرف پہاڑوں پر بے موسم برف باری اور بارش سیلابی صورتحال پیدا کر رہی ہے تو دوسری طرف بڑھتا ہوا درجہ حرارت تمام ریکارڈ توڑنے کو تیار ہے۔ پہاڑوں پر برف باری سے راجدھانی دہلی میں گرمی سے کچھ راحت ملی ہے، تاہم مشرقی ہندوستان کی حالات سب سے زیادہ خراب ہے۔ یہاں کی ریاستیں شدید گرمی کے حالات کا سامنا کر رہی ہیں، کئی علاقوں میں درجہ حرارت اوسط سے غیر معمولی طور پر بڑھ رہا ہے۔

رپورٹ کے مطابق گنگائی مغربی بنگال، بہار، ذیلی ہمالیائی مغربی بنگال، جھارکھنڈ اور اوڈیشہ سبھی کو 30 اپریل 2024 کو شدید گرمی کی لہر کے حالات کا سامنا کرنا پڑا۔

عام درجہ حرارت سے سب سے بڑا فرق مغربی بنگال کے کالائی کنڈا میں ریکارڈ کیا گیا جہاں درجہ حرارت 47.2 ڈگری سیلسیس ریکارڈ کیا گیا جو اوسط سے 10.4 ڈگری سیلسیس زیادہ تھا۔ کولکاتا بھی اس سے علیحدہ نہیں رہا۔ مغربی بنگال کے دم دم اور البیریا سمیت شہروں میں پارہ 43 ڈگری سیلسیس تک پہنچ گیا۔

گرمی کی اس لہر میں جھارکھنڈ میں بھی حالات بہت اچھے نہیں ہیں۔ مشرقی سنگھ بھوم ضلع میں واقع بہراگوڑا میں درجہ حرارت 47.1 ڈگری سیلسیس ریکارڈ کیا گیا۔ وہیں، اوڈیشہ بھی اس گرمی سے بری طرح متاثر ہے۔ باری پاڑا اور بالاسور شہروں میں درجہ حرارت بالترتیب 46.4 ڈگری سینٹی گریڈ اور 46.0 ڈگری سینٹی گریڈ ریکارڈ کیا گیا جس سے لوگوں کی مشکلات میں اضافہ ہوا جو مسلسل بلند درجہ حرارت سے نبردآزما ہیں۔

بہار کے فوربس گنج میں درجہ حرارت 41.2 ڈگری سیلسیس ریکارڈ کیا گیا ہے۔ حالانکہ حال ہی میں بہار کے کئی علاقوں میں درجہ حرارت 45 ڈگری تک پہنچ گیا تھا۔ اسی طرح تلنگانہ میں درجہ حرارت میں نمایاں اضافہ دیکھنے میں آیا ہے، راماگنڈم میں درجہ حرارت 44.4 ڈگری سیلسیس ریکارڈ کیا گیا ہے۔