موسم کا حال: دہلی والوں کو گرمی کی شدت سے نجات، آلودگی سے بھی راحت

نئی دہلی: موسم کی تبدیلی کے بعد ملک بھر میں گرمی کی لہر تھم گئی ہے۔ گزشتہ دو دنوں سے شمالی ہندوستان کے کئی حصوں میں بارش نے شدید گرمی سے راحت دلائی ہے۔ ملک کی راجدھانی دہلی میں تیز دھوپ ہونے کے باوجود شددی گرمی محسوس نہیں کی جا رہی ہے۔ محکمہ موسمیات نے دہلی میں بارش اور گرج چمک کا الرٹ جاری کیا ہے۔ دہلی والوں کو فضائی آلودگی سے بھی راحت مل گئی ہے۔

محکمہ موسمیات کے مطابق دہلی میں آج گرج چمک کے ساتھ بارش ہو سکتی ہے اور یہاں زیادہ سے زیادہ درجہ حرارت 33 ڈگری سیلسیس تک گر سکتا ہے۔ جبکہ کم سے کم درجہ حرارت 24 ڈگری تک پہنچ سکتا ہے۔ دہلی میں گزشتہ دو دنوں سے آسمان ابر آلود ہے اور ہلکی ہوائیں چل رہی ہیں اور آج صبح بھی ایسا ہی موسم نظر آیا۔ آئی ایم ڈی نے آج سے اگلے تین دنوں تک دہلی میں بوندا باندی سے لے کر گرج چمک کے ساتھ انتباہ جاری کیا ہے۔

نوئیڈا میں بھی اگلے تین دن یعنی 28 مئی تک بارش کا امکان ہے۔ نوئیڈا میں آج زیادہ سے زیادہ درجہ حرارت 38 ڈگری سیلسیس اور کم سے کم درجہ حرارت 23 ڈگری سیلسیس ریکارڈ کیا جا سکتا ہے۔ ساتھ ہی، 28 مئی تک غازی آباد میں تیز ہواؤں کے ساتھ بارش یا گرج چمک کے ساتھ بارش کے امکانات ہیں۔ گروگرام میں بھی آج سے 28 مئی تک آسمان عام طور پر ابر آلود رہے گا اور ایک یا دو بار بارش یا گرج چمک کے ساتھ بارش ہو سکتی ہے۔ مئی میں یہاں بھی درجہ حرارت 37 ڈگری سے نیچے رہے گا۔

موسم میں یہ تبدیلی تازہ مغربی ڈسٹربنس کی وجہ سے دیکھی جا رہی ہے۔ دہلی کے لوگوں کے لیے راحت کی بات ہے کہ ویسٹرن ڈسٹربنس کا اثر اگلے 4-5 دنوں تک رہنے والا ہے۔ فضا میں پیدا ہونے والی نمی کی وجہ سے 30 مئی تک زیادہ سے زیادہ درجہ حرارت 38 ڈگری سیلسیس سے نیچے رہنے کا امکان ہے۔ اس کا مطلب ہے کہ مئی کا باقی حصہ راحت دینے والا ہے۔

موسم میں تبدیلی کی وجہ سے دہلی کے لوگوں کو گرمی کے ساتھ ساتھ آلودگی سے بھی راحت ملی ہے۔ سنٹرل پالیوشن کنٹرول بورڈ کے مطابق بدھ کو دہلی کا ایئر کوالٹی انڈیکس 158 پر رہا۔ دوسری طرف، آج (جمعرات) کی صبح دہلی کی ہوا کے معیار کا اوسط انڈیکس 96 ریکارڈ کیا گیا۔ دہلی کے 34 اے کیو آئی اسٹیشنوں میں سے 22 اسٹیشنوں پر ایئر کوالٹی انڈیکس 100 سے کم ریکارڈ کیا گیا۔