پاکستان سے ’پی او کے‘ اور چین سے ’اقصائے چن‘ واپس لیں گے: آر ایس ایس لیڈر 

نئی دہلی: آر ایس ایس کے رہنما اور مسلم راشٹریہ منچ کے سربراہ اندریش کمار نے کہا ہے کہ پاکستان کو اپنے قبضے والے کشمیر کو ہندوستان کو سونپ دینا چاہئے اور ہندوستان کو چین سے اقصائے چن کو واپس لینا چاہئے۔ اندریش کمار ڈاکٹر شیاما پرساد مکھرجی نیشنل ایوارڈ فار آوٹ اسٹینڈنگ پبلک لیڈرشپ 2019 تقریب سے جمعرات کی شام خطاب کر رہے تھے۔

اندریش کمار نے کہا کہ جموں و کشمیر کے ایک حصے پر پاکستان نے غیر قانونی طور پر قبضہ کررکھا ہے اور اسے خود ہی یہ حصہ ہندوستان کو سونپ دینا چاہئے۔ اس کے علاوہ چین نے بھی ہندوستان کے ایک حصے پر قبضہ کیا ہوا ہے اور اس سے اقصائے چین بھی واپس لیا جانا چاہئے۔ انہوں نے کہا کہ ’’کیلاش مانسروورہمار اتھا اور ہمارا ہے، اسے واپس لینا چاہئے۔ صرف یہی راستہ ہے جس پر ہندوستان کوچلنا ہوگا۔“

مہاتما گاندھی کو ’منقسم بھارت‘ کے بابائے قوم جب کہ وزیر اعظم نریندر مودی کو ابھرتے ہوئے ’نئے ہندوستان‘ کا بابائے قوم بتاتے ہوئے اندریش کمار نے کہا کہ سال1947 میں ہندوستان آزاد ہوا۔ یہ ٹوٹا پھوٹا ہندوستان تھا اور مہاتما گاندھی منقسم ہندوستان کے بابائے قوم تھے۔ دفعہ 370 اور دفعہ 35اے ہٹاکر نریندر مودی نے نیا ہندوستان بنانے کا کام شروع کیا ہے۔ مودی نئے ہندوستان کے بابائے قوم ہیں۔“

خیال رہے کہ نیویارک میں دو دن پہلے مودی کے ساتھ مشترکہ پریس کانفرنس میں امریکی صدر ڈونلڈ ٹرمپ نے مودی کو ’فادر آف انڈیا‘ کہا تھا۔جس پر کانگریس سمیت کئی سیاسی جماعتوں نے سخت اعتراض کیاتھا۔

آر ایس ایس اورراشٹریہ مسلم منچ کے سربراہ نے کہا کہ1947 میں حملہ آوروں کے ساتھ جنگ بندی کا اعلان کرکے پنڈت جواہر لال نہرو نے ملک کے ساتھ دھوکہ کیا تھا۔ اس پر انہوں نے کابینہ اور فوج کے سربراہوں کے ساتھ تبادلہ خیال نہیں کیا تھا۔اسی وجہ سے پاکستان نے کشمیرکے ایک حصے پر قبضہ کرلیا تھا۔

(یو این آئی ان پٹ کے ساتھ)