ہم اڈانیوں کی نہیں، ہندوستانیوں کی حکومت بنائیں گے: راہل گاندھی

لوک سبھا انتخاب کے پیش نظر جاری انتخابی تشہیر کے دوران کانگریس کے سرکردہ لیڈران لگاتار مرکز کی مودی حکومت کو تنقید کا نشانہ بنا رہے ہیں۔ راہل گاندھی کی تشہیری مہم میں طبیعت کی کچھ ناسازی کے سبب خلل ضرور پڑا ہے، لیکن وہ سوشل میڈیا پلیٹ فارم کے ذریعہ بھی وزیر اعظم مودی پر حملے کر رہے ہیں۔ انھوں نے ’ایکس‘ پر ایک ویڈیو پوسٹ کی ہے جس میں وزیر اعظم نریندر مودی اور راہل گاندھی کی تقریر کا کچھ حصہ دکھایا گیا ہے۔ پی ایم مودی کی تقریر کے نیچے ’بس اڈانی کو دوں گا‘ لکھا ہوا ہے، اور راہل گاندھی کی تقریر کے نیچے ’ہر ہندوستانی کو دیں گے‘ تحریر کیا ہے۔

راہل گاندھی نے جو ویڈیو پوسٹ کی ہے، اس کے ساتھ لکھا ہے کہ ’’کانگریس ملک کے غریبوں، کسانوں، مزدوروں اور نوجوانوں کی خوشحالی کے لیے کام کرے گی۔ ہم اڈانیوں کی نہیں، ہندوستانیوں کی حکومت بنائیں گے۔‘‘ ساتھ ہی ویڈیو میں وہ کہتے دکھائی دے رہے ہیں کہ ’’میرا ہدف ہے کہ جتنا پیسہ نریندر مودی اڈانی کو دیتے ہیں، اتنا پیسہ میں غریبوں کو دوں گا۔ میں شمار کر رہا ہوں... ایک روپیہ آپ اڈانی کو دو گے، ایک روپیہ میں غریبوں کو دوں گا، جتنے پیسے آپ (اڈانی کو) دو گے، اتنے پیسے میں کسانوں کو، مزدوروں کو، چھوٹے دکانداروں کو، بے روزگار نوجوانوں کو دوں گا۔‘‘ راہل گاندھی ویڈیو میں یہ بھی کہہ رہے ہیں کہ ’’میں آپ کو دکھاؤں گا کہ اصلی سیاست ارب پتیوں کو مدد کرنے سے نہیں ہوتی ہے، اصلی سیاست کسانوں، مزدوروں، چھوٹے کاروباریوں، بے روزگار نوجوانوں کو مدد کرنے سے ہوتی ہے۔ میں آپ کو دکھا دوں گا۔‘‘