اگر حکومت نوٹوں سے مہاتما کی تصویر ہٹا دے تو ہم شکر گزار ہوں گے: تشار گاندھی

وڈودرا (گجرات): مہاتما گاندھی کے پڑپوتے تشار گاندھی نے کہا ہے کہ اگر ہندوستانی کرنسی نوٹوں سے مہاتما گاندھی کی تصویر ہٹا دی جاتی ہے تو وہ این ڈی اے حکومت کے شکر گزار ہوں گے۔ انہوں نے کہا کہ ’’اگر وہ کرنسی نوٹوں سے مہاتما گاندھی کی تصویر ہٹا دیتے ہیں تو میں موجودہ حکومت کا شکرگزار ہوں گا کیونکہ یہ صرف ایک تصویر ہے نہ کہ موہن داس کرم چند گاندھی یا ان کی روح اور نہ ہی یہ کسی نظریے کی نمائندگی کرتی ہے۔‘‘

وڈودرا میں ایک سوال کے جواب میں انہوں نے صحافیوں سے کہا، ’’باپو ایک نظریہ تھے، اس نظرئے کو لازوال رہنا چاہیے، ہمیں کرنسی نوٹوں پر ان کی تصویر کی ضرورت نہیں ہے، اگر حکومت باپو کی تصویر ہٹاتی ہے تو میں پہلی اور آخری بار اس حکومت کی حمایت کروں گا۔"

تشار گاندھی نے مزید کہا کہ جب سے حکمراں پارٹی اقتدار میں آئی ہے، وہ تاریخ کو دوبارہ لکھنے میں لگی ہوئی ہے اور حکومتی مشینری تاریخ کو مٹانے میں سرگرم ہے، جسے حکمراں پارٹی ناپسند کرتی ہے۔

انہوں نے کہا، ’’وہ لوگ جو مہاتما گاندھی کے قتل کے پیچھے تھے... اگر وہ مہاتما گاندھی کی تعریف نہیں کرتے اور ان کے بارے میں اچھا نہیں بولتے ہیں، تو یہ بات سمجھ میں آتی ہے۔‘‘