بنگال کو ’گجرات‘ بنانے کی ہر کوشش ناکام ہوگی: ممتا بنرجی

کولکاتا: بنگالی فلسفی، مصلح اور دانشور ایشور چندر ودیا ساگر کے مجسمے کو جسے گزشتہ مہینہ بی جے پی کے قومی صدر امت شاہ کی ریلی میں ہنگامہ آرائی کے دوران بی جے پی کے مبینہ حامیوں نے توڑدیا تھا، منگل کے روز دوبارہ ودیا ساگر کالج میں نصب کردیا گیا۔ ممتا بنرجی جلوس کی شکل میں ودیا ساگر کے مجسمے کو لے کر پہنچیں اور پھر اس کی نقاب کشائی کی گئی۔

اس موقع پر وزیر اعلیٰ ممتا بنرجی کے علاوہ ریاستی وزراء، سماجی کارکن اور بنگالی دانشوروں کی بڑی تعداد موجود تھی۔ وزیر اعلیٰ ممتا بنرجی نے اس موقع پر کہا کہ بنگال کی شبیہ خراب کرنے کی سازش کی جا رہی ہے اور ان کی پوری کوشش ہے کہ بنگال کو گجرات بنا دیا جائے۔ ممتا بنرجی نے کہا کہ میں گورنر کی عزت کرتی ہوں، مگر ہر عہدہ کی اپنی حد ہوتی ہے۔ انہوں نے کہا کہ بنگال کو بدنام کرنے کی کوشش جا رہی ہے اگر گورنر بنگال کے کلچر کو بچانے کے لئے فکر مند ہیں تو انہیں ساتھ آکر کام کرنا چاہیے۔

وزیر اعلیٰ نے کہا کہ بنگال کے پاس تاریخی ورثہ ہے مگر اس ورثے کو ختم کرنے کی مسلسل کوشش کی جا رہی ہے اور دراصل یہ بنگال کو گجرات بنانے کی سازش ہے اور بنگال گجرات نہیں بن سکتا۔ مرکزی وزار ت داخلہ کی جانب سے بنگال حکومت کو ایڈوائزری جاری ہونے کے ایک دن بعد گورنر کیسری ناتھ ترپاٹھی نے وزیر اعظم مودی اور وزیر داخلہ امت شاہ سے دہلی میں گزشتہ روزملاقات کی تھی۔

ممتا بنرجی نے کہا کہ بی جے پی بنگال میں تشدد کے کلچر کو فروغ دے رہی ہے انہوں نے کہا کہ اب تک جن دس لوگوں کی موت ہوئی ہے ان میں 9 افراد کا تعلق ترنمول کانگریس سے ہے۔

وزیرا علیٰ نے کہا کہ ودیا ساگر جیسے عظیم مفکر و دانشور کے مجسمے کو توڑنے کا مقصد صرف بنگال کے کلچر کو تباہ کرنا ہے۔ انہوں نے کہا کہ ایک سیاسی پارٹی کو پہلے مہذب ہونا چاہیے۔ جن لوگوں نے مجسمے کو توڑا تھا وہ کبھی بھی مہذب نہیں ہوسکتے ہیں اور یہ بنگال کا کلچر نہیں ہے۔ ممتا بنرجی نے کہا کہ میں لوگوں کے لئے کام کرتی ہوں، جبکہ بی جے پی میڈیا کے ذریعہ ریاست کی شبیہ کو نقصان پہنچانے کی کوشش کر رہی ہے۔

ممتا بنرجی نے کہا کہ اگر ضرورت ہے تو مجھے ماردیں، مجھے کچھ بھی نہیں چاہیے لیکن میں عوام کے لئے کام کرتی رہوں گی، اترپردیش اور دیگر مقامات پر کئی افراد بشمول ایک لڑکی کو مار دیا گیا ہے مگر میڈیا میں اس کی خبر نہیں آئی کیوںکہ میڈیا کو بھی بی جے پی کنٹرول کر رہی ہے۔

ممتا بنرجی نے کہا کہ کالج کے احاطہ میں ودیا ساگر کی خدمات کو اجاگر کرنے کے لئے میوزیم بنایا جائے گا اور اس کے لئے ریاستی حکومت نے ایک کروڑ روپے مختص کیے ہیں۔ ودیا ساگر 19 ویں صدی کے مفکر ہیں جنہوں نےسماجی اصلاحات کے لئے تحریکیں چلائی تھیں۔