کرانہ دکانوں میں شراب کی فروخت پر مہاراشٹر سرکار کو انتباہ

جہاں کئی ریاستوں میں شراب پر مکمل پابندی ہے وہیں دہلی جیسی کچھ ریاستوں میں شراب کی بکری کو فروغ دینے کے لئے حکومتی ستح پر اقدام اٹھائے جا رہے ہیں۔ دہلی میں عام آدمی پارٹی کی کیجریوال حکومت نے جہاں شراب کی دکانوں کے لئے مزید لائسنس جاری کئے ہیں وہیں شراب کی دکانوں میں شراب کی بوتل کے ساتھ ایک بوتل مفت دینے کی بھی اسکیم شروع کی تھی۔اب مہاراشٹر کی مخلوط حکومت نے شراب کو کرانہ دکانوں میں فروخت کے لئے لوگوں کی رائے طلب کی ہے۔

اورنگ آباد سے آل انڈیا مجلس اتحاد المسلمین (اے آئی ایم آئی ایم) کے رکن پارلیمنٹ امتیاز جلیل نے جمعرات کو ریاستی حکومت کو دھمکی دی کہ اگر انہوں نے کرانہ کی دکانوں میں شراب کی فروخت کی اجازت دی تو وہ دکانوں کو اجاڑ دیں گے۔

جیسے ہی حکومت نے کرانہ کی دکانوں میں شراب کی فروخت سے متعلق نوٹیفکیشن پر عوامی اعتراضات اور تجاویز طلب کیں، جلیل نے ٹویٹ کیا کہ "میری رائے سیدھی ہے، آپ بیچیں، ہم دکانیں اجاڑ دیں گے۔"
اے آئی ایم آئی ایم ایم پی نے مہاراشٹر کی خواتین سے کہا ہے کہ وہ ریاستی حکومت کے اس فیصلے کے خلاف کھل کر سامنے آئیں۔