زیر تعمیر مندر کی دیوار منہدم، 5 مزدور ملبہ میں دبے، ایک کی موت

دہلی سے ملحق گروگرام میں پیر کے روز ایک بڑا حادثہ پیش آیا۔ یہاں سیکٹر 15 کے پارٹ 2 میں زیر تعمیر جگن ناتھ مندر کی دیوار منہدم ہو گئی۔ اس دوران موقع پر موجود پانچ مزدور ملبہ میں دب گئے۔ حادثہ کی خبر ملتے ہی وہاں پہنچی بچاؤ ٹیم نے سبھی مزدوروں کو بحفاظت باہر نکالنے کے لیے ریسکیو مہم چلائی۔ بعد ازاں سبھی کو باہر نکالا گیا اور علاج کے لیے اسپتال میں داخل کرایا گیا۔ ڈاکٹروں نے چار کی حالت ٹھیک بتائی ہے، جبکہ ایک مزدور کی علاج کے دوران موت ہو گئی۔

بتایا جا رہا ہے کہ سول لائن واقع جگن ناتھ مندر میں بیسمنٹ کنسٹرکشن کا کام چل رہا تھا جس میں کافی مزدور کام کر رہے تھے۔ بیسمنٹ میں مٹی دھنسنے سے پاس میں موجود بجلی بورڈ کی دیوار نیچے سے ٹوٹ کر مزدوروں پر گر گئی۔ اس حادثہ میں 26 سالہ مزدور چندرپال کی موت ہو گئی۔ این ڈی آر ایف اور ایس ڈی آر ایف سول ڈیفنس کی ٹیمیں یہاں کام کر رہی ہیں۔