تریپورہ اسمبلی انتخابات کے لئے ووٹنگ جاری، مودی اور کھڑگے نے ووٹروں سے کی یہ اپیل

نئی دہلی: وزیر اعظم نریندر مودی نے تریپورہ کے ووٹروں، خاص طور پر نوجوان ووٹروں سے ریکارڈ تعداد میں اپنے حق رائے دہی کا استعمال کرنے اور جمہوریت کو مضبوط کرنے کی اپیل کی ہے۔ پی ایم مودی نے ٹوئٹر پر اپیل کی، "میں تریپورہ کے لوگوں سے ریکارڈ تعداد میں ووٹنگ کرنے اور جمہوریت کے اتسو کو مضبوط کرنے کی اپیل کرتا ہوں۔ میں خاص طور پر نوجوان ووٹروں سے اپیل کرتا ہوں کہ وہ اپنا حق رائے دہی استعمال کریں۔"

ریاست میں اسمبلی انتخابات کے لیے پولنگ آج صبح تمام حلقوں میں پرامن طریقے سے شروع ہوئی اور لوگ اپنے حق رائے دہی کا استعمال کرنے کے لیے صبح سے ہی پولنگ بوتھوں کے باہر قطاروں میں کھڑے نظر آئے۔

کھڑگے نے عوام سے کی اپنے حق رائے دہی کا استعمال کرنے کی اپیل

وہیں، کانگریس کے صدر ملکارجن کھڑگے نے جمعرات کے روز عوام سے تری پورہ اسمبلی کی 60 رکنی سیٹوں کے لئے جاری پولنگ میں اپنے حق رائے دہی کا استعمال کرنے کی اپیل کی۔ کھڑگے نے ٹوئٹ کیا، "میں ہر ایک سے خاص طور پر نوجوانوں سے گزارش کرتا ہوں کہ وہ ووٹ دینے کے لیے گھروں سے نکلیں اور جمہوریت کے اس جشن کو مضبوط کریں اور امن اور ترقی کے لیے ووٹ دیں۔ بغیر کسی خوف کے ووٹ دیں۔"

انہوں نے کہا کہ تریپورہ کے لوگ ریاست میں تبدیلی لانے کے لیے متحد ہیں۔ ریاست کے 60 اسمبلی حلقوں میں آج صبح 7 بجے سے ووٹنگ شروع ہو گئی ہے۔ ووٹنگ کے لیے 3328 پولنگ مراکز بنائے گئے ہیں۔ ریاست میں 13.98 خواتین ووٹرز سمیت تقریباً 28.23 لاکھ ووٹرز آج اپنے حق رائے دہی کا استعمال کریں گے۔ تمام ووٹرز 259 امیدواروں کے مستقبل کا فیصلہ کریں گے۔ جس میں وزیر اعلیٰ مانک ساہا اور مرکزی وزیر پرتیما بھومک کی قسمت بھی شامل ہے۔ ووٹنگ شام 4 بجے تک ہوگی۔ انتخابی نتائج 2 مارچ کو آئیں گے۔

خیال رہے کہ تریپورہ میں آج 60 رکنی قانون ساز اسمبلی کے لیے ووٹنگ ہو رہی ہے۔ اس میں حکمران جماعت بھارتیہ جنتا پارٹی کا مقابلہ بنیادی طور پر بائیں بازو کی پارٹیوں، کانگریس اور کچھ دیگر علاقائی جماعتوں سے سمجھا جا رہا ہے۔ ووٹنگ کے حوالے سے ووٹرز میں کافی جوش و خروش ہے۔

(یو این آئی ان پٹ کے ساتھ)