ووٹر لسٹ صحیح بنے، بوتھ پر پولنگ ایجنٹ کو ابھی سے فعال کریں: کمل ناتھ

بھوپال: کانگریس کے سینئر لیڈر اور مدھیہ پردیش کے سابق وزیر اعلیٰ کمل ناتھ نے کہا ہے کہ صحیح ووٹر لسٹ بنائی جانی چاہئے، جو نام جعلی ہیں انہیں ہٹوانے اور اہل و زیادہ سے زیادہ نوجوانوں کے نام ووٹر لسٹ میں شامل کرنے کا کام کریں۔ بوتھ پر ایجنٹ کا کردار سب سے اہم ہوتا ہے، بوتھ ایجنٹ کو ابھی سے فعال کریں۔

کمل ناتھ نے آج یہاں ریاستی کانگریس ہیڈکوارٹر میں منعقدہ ضلع/شہر کانگریس کمیٹی کے صدور، ضلع انچارج/شریک انچارجز، ضلع تنظیمی وزیر، کانگریس کی جانب سے مقرر کئے گئے ووٹرلسٹ ورک انچارج اور مورچہ تنظیموں کے ریاستی صدور کی مشترکہ ووٹر لسٹ پر نظرثانی- الیکشن مینجمنٹ ٹریننگ ورکشاپ سے خطاب کرتے ہوئے یہ بات کہی۔

 انہوں نے کہا کہ آج کی سیاست بہت مقامی ہوگئی ہے، آج کی سیاست میں بہت کچھ بدل گیا ہے۔ جب تک آپ کسی کی بیماری کو ٹھیک طرح سے نہیں سمجھیں گے، آپ اس کا صحیح علاج نہیں کر پائیں گے۔ گاؤں کی سطح پر ٹیم مضبوط ہونی چاہیے۔ پارٹی میں ہمارے منڈل، سیکٹر کے ساتھی عزت چاہتے ہیں، ہمیں ان کا احترام کرنا ہوگا۔

سابق وزیر اعلیٰ نے کہا کہ کانگریس ریاست کے لیے منشور تو تیار کرے گی ہی، ضلع سطح پر بھی اپنا منشور تیار کریں، جس میں مقامی مسائل شامل ہوں۔ اگر ووٹر لسٹ درست نہیں ہے تو اسے پوری سرگرمی اور وفاداری کے ساتھ درست کروائیں۔ آپ سب کو ابھی سے ووٹروں کی نظرثانی کے کام میں پوری طرح مشغول رہنا ہوگا۔ انہوں نے کہا کہ وہ مسلسل دورے کر رہے ہیں، انہیں ہر اہم معلومات حاصل ہو رہی ہے۔

سنجے کاملے نے ووٹر لسٹ کے انتظام کے حوالے سے حاضرین کو ٹریننگ دی۔ وہیں یونیسیف میں کام کر چکی نکیتا کھنہ نے آج ریاستی کانگریس ہیڈکوارٹر میں کمل ناتھ کے سامنے کانگریس کے نظریے سے متاثر ہو کر کانگریس کی رکنیت قبول کی۔ اندور کے سابق کونسلر دلیپ کوشل اور روی گرنانی کو اندور میں ووٹر لسٹ میں لاکھوں کی تعداد میں جعلسازی کا پردہ فاش کرنے اور اُمریا کے سنتوش سنگھ کو منڈلم کے علاقے میں قابل ستائش کام کرنے پر اعزاز سے نوازا گیا۔

اس موقع پرووٹر لسٹ پر نظر ثانی اور الیکشن مینجمنٹ ٹریننگ ورکشاپ میں سابق وزیر سجن سنگھ ورما، ریاستی کانگریس کے نائب صدر راجیو سنگھ، پرکاش جین، جے پی دھنوپیا، ووٹر لسٹ پر نظر ثانی پروگرام کے انچارج مہیندر جوشی، سیوا دل کے صدر یوگیش یادو، راجکمار پٹیل، چندریکا پرساد دویدی، وبھا بندوڈاگور، سنگیتا شرما، سمیت ریاست بھر سے مدعو ضلع/سٹی کانگریس کمیٹی کے صدور، ضلع انچارج/شریک انچارج، ضلع تنظیمی وزیر، کانگریس کی جانب سے بنائے گئے ووٹر لسٹ کے ورک انچارج موجود تھے۔