آگرہ: یکم ستمبر سے تاریخی مقامات پر جانے کی اجازت، لیکن نہیں ہو سکے گا تاج محل کا دیدار

کورونا انفیکشن کے بڑھتے اثرات کے درمیان اتر پردیش کے کچھ علاقوں میں اَن لاک کا عمل بھی چل رہا ہے۔ ایسے اضلاع جہاں کورونا انفیکشن کنٹرول میں ہے، وہاں بازار اور دکانیں کھل رہی ہیں۔ آگرہ میں بھی حالات پہلے کے مقابلے کچھ بہتر ہوئے ہیں اس لیے سیاحتی مقامات کو کھولنے کا فیصلہ لیا گیا ہے۔ ضلع انتظامیہ نے اعلان کیا ہے کہ یکم ستمبر سے سبھی تاریخی مقامات سیاحت کے لیے کھول دیئے جائیں گے۔ حالانکہ ابھی تاج محل اور آگرہ فورٹ کو نہیں کھولا جائے گا۔

ضلع مجسٹریٹ کے ذریعہ جاری حکم کے مطابق سکندرہ، فتح پور سیکری، اعتماد الدولہ، مہتاب باغ وغیرہ سیاحتی مقامات یکم ستمبر سے کھل جائیں گے لیکن سیاحوں کو انتہائی احتیاط کے ساتھ سیر و سیاحت سے لطف اندوز ہونا پڑے گا۔ ضلع مجسٹریٹ کے ذریعہ جاری حکم میں کہا گیا ہے کہ ہفتہ اور اتوار کے روز لاک ڈاؤن کی وجہ سے سیاحتی مقامات بھی بند رہیں گے کیونکہ اس دوران یو پی حکومت کے ذریعہ جاری احکامات پر بھی عمل کرنا ہوگا۔

جاری حکم میں یہ بھی کہا گیا ہے کہ پہلے سے مقرر کردہ 'بفر زون' کے احکامات کو ترمیم کر کے اور ہفتہ واری بند کو چھوڑ کر کووڈ-19 کے حفاظتی تدابیر یعنی ماسک و سوشل ڈسٹنسنگ کے ساتھ آگرہ میں تاج محل/آگرہ قلعہ کو چھوڑ کر دیگر سبھی تاریخی مقامات قبل سے مقررہ وقت کے مطابق یکم ستمبر 2020 سے کھولے جائیں گے۔ ساتھ ہی ضلع انتظامیہ نے یہ بھی کہا ہے کہ تاج محل اور آگرہ قلعہ کو کھولے جانے سے متعلق فیصلہ اگلے مرحلہ میں لیا جائے گا۔