پھر ’اے آئی‘ کا شکار ہوئے وراٹ کوہلی، شبھمن گل کی برائی کرنے والی ڈیپ فیک ویڈیو وائرل

ہندوستانی ٹیم کے مایہ ناز بلے باز وراٹ کوہلی ایک بار پھر مصنوعی ذہانت یعنی آرٹیفشیل انٹلیجنس کا شکار ہو گئے ہیں۔ ان کی ایک ڈیپ فیک ویڈیو تیزی کے ساتھ سوشل میڈیا پر وائرل ہو رہی ہے جس میں وہ شبھمن گل کی بُرائی کرتے ہوئے دکھائی دے رہے ہیں۔

غور کرنے والی بات یہ ہے کہ میدان پر وراٹ کوہلی اور شبھمن گل کے درمیان رشتہ بہت دوستانہ ہے۔ یہی وجہ ہے کہ جب گل کی برائی کرتے ہوئے وراٹ کی ویڈیو سوشل میڈیا پر سامنے آئی تو لوگ حیران ہو گئے۔ حالانکہ جلد ہی یہ انکشاف ہو گیا کہ ویڈیو فرضی ہے جو اے آئی (مصنوعی ذہانت) کے ذریعہ تیار کیا گیا ہے۔

اس ڈیپ فیک ویڈیو میں وراٹ کہتے دکھائی دے رہے ہیں کہ ’’گل کی تکنیک شاندار ہے، لیکن انھیں ہم سے آگے رکھنے کی ضرورت نہیں ہے۔ لوگ اگلے وراٹ کوہلی کی بات کر رہے ہیں، لیکن میں صاف کر دینا چاہتا ہوں کہ وراٹ کوہلی صرف ایک ہے۔ میں نے سب سے خطرناک گیندبازوں کا سامنا کیا ہے۔ سب سے مشکل حالات میں اچھی کارکردگی کا مظاہرہ کیا ہے اور ایسا ایک دہائی سے زیادہ وقت تک لگاتار کیا ہے۔‘‘ وراٹ مزید کہتے ہیں کہ ’’ہندوستانی کرکٹ میں ’بھگوان‘ (سچن تندولکر) ہیں، اور ان کے بعد میں ہوں۔ یہ ایک بنچ مارک ہے۔ گل کو وہاں تک پہنچنے سے پہلے طویل راستہ طے کرنا ہے۔‘‘

واضح رہے کہ اس سے قبل بھی وراٹ کوہلی اے آئی کا شکار بن چکے ہیں۔ ان کی ڈیپ فیک ویڈیو سامنے آ چکی ہے جس میں ایک گیمنگ کا وہ پروموشن کرتے ہوئے دکھائی دیے تھے۔ بعد میں پتہ چلا کہ وہ ایک ڈیپ فیک ویڈیو ہے جس میں وراٹ کا غلط طریقے سے استعمال کیا گیا ہے۔ اس سے قبل سچن تندولکر اور ان کی بیٹی سارہ تندولکر کی بھی ڈیپ فیک ویڈیو وائرل ہو چکی ہے۔