وزیر اعلیٰ راجستھان کے نام پر چہ میگوئیوں کے درمیان دہلی پہنچیں وسندھرا، شاہ-نڈا سے ملاقات کے لیے وقت مانگا!

نئی دہلی: راجستھان میں نئے چہرے کو وزیر اعلی بنانے کے امکانات اور چہ میگوئیوں کے درمیان راجستھان کی سابق وزیر اعلی وسندھرا راجے سندھیا پارٹی ہائی کمان سے ملنے اور اپنا موقف پیش کرنے دہلی پہنچ گئی ہیں۔

ذرائع کا کہنا ہے کہ وسندھرا راجے سندھیا نے پارٹی کے قومی صدر جے پی نڈا اور مرکزی وزیر داخلہ امت شاہ سے ملاقات کا وقت مانگا ہے۔ بتایا جا رہا ہے کہ وسندھرا راجے سندھیا پارٹی کے دونوں اعلیٰ لیڈروں سے مل کر اپنا موقف پیش کرنا چاہتی ہیں۔

خیال رہے کہ راجستھان اسمبلی انتخابات کے انتخابی نتائج کے بعد جس طرح سے ارکان اسمبلی نے جے پور میں وسندھرا راجے سندھیا کی رہائش گاہ پر میٹنگ شروع کی، اس سے یہ پیغام جا رہا تھا کہ وسندھرا راجے سندھیا وزیر اعلیٰ کے عہدے کے لیے ہائی کمان پر دباؤ بنانے کے لیے ارکان اسمبلی کو متحرک کر کے اپنی طاقت کا مظاہرہ کر رہی ہیں۔

جیسے ہی بدھ کو یہ خبر آئی کہ پارٹی ہائی کمان نے ایک نئے چہرے کو راجستھان کا وزیر اعلی بنانے کا فیصلہ کیا ہے، وسندھرا راجے سندھیا نے دہلی آ کر پارٹی ہائی کمان کے سامنے اپنا کیس پیش کرنے کا فیصلہ کیا۔