یوگی راج میں 6 مہینے سے نہیں ملی صفائی ملازمین کو تنخواہ، بھُوک ہڑتال شروع

یوگی راج میں صفائی ملازمین تنخواہ نہ ملنے سے بہت پریشان ہیں۔ باندا ضلع کے اترا نگر پالیکا پریشد کے صفائی ملازمین کو گزشتہ 6 مہینے سے تنخواہ نہیں ملی ہے جس کی وجہ سے ان کے سامنے کئی طرح کے مسائل کھڑے ہو گئے ہیں۔ پریشان ہو کر ان ملازمین نے احتجاج ظاہر کرنے کا فیصلہ کیا اور ضلع مجسٹریٹ دفتر کی صاف صفائی کے بعد بھوک ہڑتال شروع کر دی۔

اکھل بھارتیہ کرمچاری مزدور سبھا کے سربراہ انل بھارتیہ نے اس سلسلے میں میڈیا کو بتایا کہ ’’نگر پالیکا پریشد اترا کے صفائی ملازمین کو گزشتہ 6 مہینے سے تنخواہ نہیں دی گئی ہے۔ ان کی فیملی بھکمری کے دہانے پر پہنچ گئی ہے۔ تنخواہ دلانے کے مطالبہ کو لے کر صفائی ملازمین منگل کو ضلع مجسٹریٹ سے ملنا چاہتے تھے، لیکن انھوں نے ڈانٹ کر بھگا دیا۔ صفائی ملازمین کو اس وقت دیکھا کہ ڈی ایم آفس میں بہت گندگی ہے، اور سبھی ملازمین نے دفتر کی صاف صفائی شروع کر دی۔ اس کے بعد اشوک لاٹ تراہے کے پاس سبھی نے بھوک ہڑتال شروع کر دی۔‘‘

انل بھارتیہ کا کہنا ہے کہ سبھی صفائی ملازمین مطالبات پوری ہونے تک اپنا احتجاج جاری رکھیں گے۔ ملازمین نے فیصلہ کیا ہے کہ جب تک مطالبات پورے نہیں ہوتے، احتجاجاً وہ باندا شہر میں روزانہ آٹھ گھنٹے کسی نشان زد جگہ کی صفائی کریں گے اور بقیہ 16 گھنٹے بھوک ہڑتال کریں گے۔ اس درمیان اترا قصبے کی صفائی بند رہے گی۔

سٹی مجسٹریٹ پردیپ کمار سنگھ نے اس معاملے میں بتایا کہ ’’صفائی ملازمین کی بقایہ تنخواہ ادا کرنے سے متعلق حکم نگر پالیکا پریشد اترا کے متعلقہ افسر کو بھیج دیا گیا ہے اور جلد ہی ان کے مسائل کا نمٹارا ہو جائے گا۔‘‘