اتر پردیش: ’ووٹر کو سوچنا ہوگا کہ شیوچوک پر گھنٹہ بجے گا یا مسجد میں اللہ اکبر‘، بی جے پی چیئرمین کا متنازعہ بیان

اتر پردیش میں بلدیاتی انتخابات کے پیش نظر متنازعہ بیانات کا سلسلہ تھمنے کا نام نہیں لے رہا ہے۔ تازہ معاملہ باغپت کا ہے جہاں بڑوت میں موجودہ بی جے پی چیئرمین امت رانا نے انتخابی جلسہ سے خطاب کرتے ہوئے انتہائی متنازعہ بیان دے ڈالا۔ انھوں نے کہا کہ ’’یہاں 11 مئی کو انتخاب ہونا ہے۔ ایسے میں یہاں کے ووٹرس کو سوچنا ہوگا کہ گھنٹہ شیوچوک پر بجے یا پھوس والی مسجد میں اللہ اکبر کی صدا بلند ہو۔‘‘

بی جے پی لیڈر اتنے پر ہی خاموش نہیں ہوئے، بلکہ یہاں تک کہہ دیا کہ لوگوں کو خود طے کرنا ہوگا کہ گھر کے باہر مرغے کی ٹھیلی لگوانی ہے یا پھر سُشاسن لانا ہے۔ بی جے پی امیدوار سدھیر مان کے حق میں منقعد انتخابی جلسہ میں انھوں نے کہا کہ یہ کوئی عام انتخاب نہیں ہے بلکہ یہ ہندوستان-پاکستان کا انتخاب ہے۔ اس لیے سبھی کو متحد ہو کر بی جے پی کے حق میں ووٹ کرنا ہوگا۔

قابل ذکر ہے کہ اسی طرح کا بیان اسمبلی انتخاب میں وزیر اعلیٰ یوگی آدتیہ ناتھ نے بھی دیئے تھے۔ اب بلدیاتی انتخاب میں مقامی لیڈران بھی اسی طرح کے بیانات کے سہارے بی جے پی کو کامیابی دلانے کے لئے کوشاں ہیں۔  بتایا جاتا ہے کہ بدھ کے روز بڑوت کے گھٹا بازار میں سدھیر مان کی طرف سے جلسہ منعقد کیا گیا تھا۔ اس میں ریاستی وزیر کرشن پال ملک، سابق رکن اسمبلی سہیندر سنگھ رمالا، سابق ریاستی وزیر چودھری صاحب سنگھ سمیت کئی بی جے پی لیڈران موجود تھے۔

اسی دوران بی جے پی لیڈر امت رانا نے اسٹیج سے بولتے ہوئے کہا کہ یہی موقع ہے جب لوگ طے کر سکیں گے کہ گھر کے باہر مرغوں کی ٹھیلی لگوانی ہے یا پھر سُشاسن لانا ہے۔ امت رانا جب یہ بیان دے رہے تھے تو جلسہ میں موجود سبھی لوگ زندہ باد کے نعرے لگا رہے تھے۔