اتر پردیش: مدارس کے طلبا کو دی جائے گی این سی سی اور این ایس ایس کی ٹریننگ

اتر پردیش کے مدرسوں کو جدید بنانے اور وہاں پڑھنے والے طلبا کو سماجی پروگرام سے جوڑے جانے کے منصوبہ پر ریاستی حکومت لگاتار کام کر رہی ہے۔ اسی تعلق سے مدرسہ میں این سی سی (نیشنل کیڈٹ کور) اور این ایس ایس (نیشنل سروس اسکیم) کی تربیت شروع کیے جانے کی کوششیں بھی تیز ہو گئی ہیں۔

مدرسہ بورڈ کے رجسٹرار راگھویندر سنگھ نے بدھ کے روز بتایا کہ مدرسہ میں پڑھنے والے طلبا کو جدیدیت کی جانب گامزن کر کے طلبا و طالبات میں بھائی چارہ، ڈسپلن، مذہبی ہم آہنگی، خدمت کا جذبہ جگانے کے لیے اب این سی سی اور این ایس ایس کی ٹریننگ دی جائے گی۔ انھوں نے مزید کہا کہ اتر پردیش مدرسہ ایجوکیشن کونسل نے سبھی مدارس کو اس سلسلے میں ہدایات بھیج دی ہیں۔

راگھویندر سنگھ نے بتایا کہ ’’این سی سی کا مقصد ہوتا ہے کہ ملک کی حفاظت کے لیے سبھی کو آگے بڑھائیں۔ مدرسے میں پڑھنے والے طلبا کو ہندوستانی فوج میں کیریر بنانے کا موقع بھی ملے گا۔ اس کے علاوہ انھیں تعلیم کے علاوہ ملک کی خدمت کرنے کے لیے ٹریننگ دی جا رہی ہے۔‘‘ انھوں نے مزید بتایا کہ بورڈ یہ بھی دیکھے گا کہ اس کی ہدایات پر کتنے مدارس نے عمل کیا ہے۔

رجسٹرار نے بتایا کہ مدارس کے طلبا کی ہمہ جہت ترقی کے لیے این ایس ایس کی ٹریننگ بھی بے حد ضروری ہے۔ اس ٹریننگ میں سماجی برائیوں کے خاتمہ، ماحولیاتی سیکورٹی، صاف صفائی، ایمرجنسی یا قدرتی آفات سے متاثر لوگوں کی مدد جیسے سبجیکٹ پر طلبا کو بیدار کیا جائے گا۔