یوگی حکومت کا کمال: آگرہ میں لاکھوں روپے سے تعمیر 6 سَڑکیں غائب!

اتر پردیش میں بی جے پی کی یوگی آدتیہ ناتھ حکومت ترقی کے بڑے بڑے دعوے کرتی رہی ہے اور کئی بار ان دعووں کی قلعی بھی کھلی ہے۔ اب ایک نیا معاملہ منظر عام پر آیا ہے جو یوگی حکومت پر سوالیہ نشان کھڑے کر رہا ہے۔ آپ کو یہ جان کر حیرانی ہوگی کہ ’تاج محل‘ کے لیے مشہور آگرہ شہر میں لاکھوں روپے کے خرچ سے تعمیر 6 سڑکیں غائب ہو گئی ہیں۔ اس بات کا پتہ حال میں ہی اس وقت چلا جب اعلیٰ افسران ان نوتعمیر سڑکوں کا معائنہ کرنے کے لیے موقع پر پہنچے۔

ملی خبروں کے مطابق آر ای ایس نے کاغذات میں آگرہ کی پرانی عیدگاہ کالونی میں دو اور وبھو نگر کے چار سیکٹروں میں تقریباً 50 لاکھ روپے کے خرچ سے حال ہی میں چھ سڑکوں کی تعمیر کرانے کا دعویٰ کیا تھا۔ لیکن جب ان نوتعمیر سڑکوں کا معائنہ کرنے علاقے کے چیف ڈیولپمنٹ افسر (سی ڈی او) جے. ریبھا پہنچے تو انھیں موقع پر وہ سڑکیں نظر ہی نہیں آئیں جن کا کاغذوں میں تقریباً 50 لاکھ روپے کی لاگت سے تعمیر کرانے کا دعویٰ کیا گیا تھا۔ معاملے کا انکشاف ہونے کے بعد سی ڈی او نے آر ای ایس کے انجینئر کو نوٹس بھیجا ہے۔

دراصل آر ای ایس کو شہر کے پرانی عیدگاہ کالونی میں تقریباً 18 لاکھ روپے کی لاگت سے دو سڑکوں کی تعمیر کرانی تھی۔ اس کے علاوہ محکمہ کو وبھو نگر کے بھی چار سیکٹروں میں چار سڑکوں کی تعمیر کروانی تھی۔ اس پورے کام کی کل لاگت تقریباً 50 لاکھ روپے بتائی جا رہی ہے۔ سڑک تعمیر کے بعد علاقے کے سی ڈی او نے موقع پر جا کر ان سڑکوں کا جائزہ لیا۔ عیدگاہ کالونی میں کس مقام پر کون سی سڑک بنائی گئی ہے، اس کا پتہ نہیں چلا۔ جب کہ وبھو نگر کے سیکٹر ایک، دو، تین اور چار میں بنائی گئی سڑکوں کی بھی واضح جانکاری نہیں ملی۔

سی ڈی او نے اس دوران افسران کی تحریری رپورٹس پر بھی نظر ڈالی۔ سی ڈی او نے بتایا کہ محکمہ جاتی افسران نے اپنی رپورٹس میں سڑکوں کی لمبائی، چوڑائی، موٹائی کا بھی تذکرہ نہیں کیا ہے۔ یہاں تک کہ تعمیری کام میں تخمینی رقم کا بھی تذکرہ نہیں ہے۔ دونوں مقامات پر بنائی گئی سڑکوں کی حالت، خرچ کی رقم کے بارے میں بھی نہیں بتایا گیا ہے۔ اس معاملے کو لے کر سی ڈی او نے آر ای ایس کے ایگزیکٹیو انجینئر کو نوٹس بھیج کر جواب مانگا ہے۔

اس معاملے پر سی ڈی او جے. ریبھا نے بتایا کہ آگرہ کی پرانی عیدگاہ کالونی اور وبھو نگر کی سڑکوں کی تفصیلات میں بنائی گئی نئی سڑکوں کے بارے میں جانکاری نہیں دی گئی۔ جائزہ رپورٹ میں بھی خامیاں پائی گئی تھیں، جس کے بعد جواب طلب کیا گیا ہے۔ وہیں، اس معاملے پر آر ای ایس کے ایگزیکٹیو انجینئر ویریندر سنگھ نے دعویٰ کیا کہ پرانی عیدگاہ کالونی میں دو سڑکیں بنوا دی گئی ہیں جب کہ وبھو نگر میں ابھی کام چل رہا ہے۔ انھوں نے کہا کہ نئی سڑکوں پر بورڈ لگا کر خرچ وغیرہ لکھوایا جائے گا۔