اقتصادی جنگ: امریکا پر چین کا بھرپور جوابی وار!

حال ہی میں امریکہ نے چینی مصنوعات پر لگنے والے ٹیرف میں اضافہ کا اعلان کیا تھا اور اب چین نے بھی اس کا جواب دیا ہے اور امریکہ سے درآمد ہونے والی مصنوعات پر لگنے والے کسٹم کو 25 فیصد بڑھا دیا ہے اور چین کے اس حملہ سے امریکی صنعت کار بہت پریشان ہیں ۔

ذرائع کے مطابق چین کی سرکاری خبر رساں ایجنسی کے مطابق چینی مصنوعات پرامریکا میں 16 ارب ڈالر کا کسٹم ٹیکس لگائے جانے کے کچھ ہی دیربعد امریکی مصنوعات پر چین میں کسٹم ٹیکس میں 25 فی صد اضافہ کردیا ہے۔

واضح رہے چین نے امریکہ کی جانب سے ٹیرف میں اضافہ کرنے کے بعد ہی کہہ دیا تھا کہ وہ اس تعلق سے جوابی اقدامات ضرور کرے گا۔ امید کی جا رہی تھی کہ امریکی رد عمل میں چین بھی امریکی مصنوعات پر ٹیکس ضرور لگائے گا۔قبل ازیں چینی حکومت نے کہا تھا کہ وہ امریکہ کی طرف سے سولہ ارب ڈالر کا اضافی ٹیکس عاید کرنے کے جواب میں ’ضروری جوابی اقدامات‘ کرے گا۔

چینی وزارت تجارت کی طرف سے جاری ایک بیان میں کہا گیا ہے کہ بیجنگ امریکا کی طرف سے چینی مصنوعات پر اضافی ٹیکس لگانے کی شدید مذمت کرتا ہے۔ بیان میں کہا گیا ہے کہ چین امریکا کے ساتھ جاری تجارتی تنازع کو بین الاقوامی ٹریڈ آرگنائزیشن میں اٹھائے گا۔

خیال رہے کہ جمعرات کو امریکی حکومت نے چین کی مصنوعات پر تقریباً سولہ ارب ڈالر کا ٹیکس لگا دیا ہے۔خبر رساں ایجنسی’اے ایف پی‘ کے مطابق امریکا کی جانب سے چینی مصنوعات پر 16 ارب ڈالر کے نئے ٹیکسوں کا اعلان نافذ کردیا گیا ہے۔