ارمیلا ماتونڈکر نے آٹو ڈرائیور بن کر مانگے ووٹ، عام لوگوں کا جیتا دل

ارمیلا ماتونڈکر ممبئی شمال سے کانگریس سے چناوی میدان میں ہیں اور انہوں نے اپنی انتخابی مہم کا آغاز بھی کر دیا ہے۔ کانگریس میں شامل ہونے کے بعد پارٹی نے انہیں اپنا امیدوار بنایا ہے۔ ارمیلا گزشتہ روز گورئی علاقہ میں اپنی انتخابی مہم کے دوران آٹو ڈرائیوروں کے ساتھ دکھائی دیں۔ ارمیلا نے وہاں موجود تمام آٹو ڈرائیورں سے ملاقات کی اور ان لوگوں سے اپنے حق میں ووٹ کرنے کی اپیل کی ۔

واضح رہے آٹو ڈرائیورں سے ارمیلا کی ملاقات کی تصاویر سوشل میڈیا پر خوب وائرل ہو رہی ہیں۔ ان تصاویر میں آٹو ڈرائیووں سے بات چیت کے علاوہ ارمیلا آٹو ڈرائیور کی سیٹ پر بیٹھی بھی نظر آرہی ہیں۔ ارمیلا کا مقابلہ بی جے پی کے رکن پارلیمنٹ گوپال شیٹی سے ہے۔ واضح رہے اس سے پہلے کانگریس کے امیدوار گووندا نے اس سیٹ پر بی جے پی کے قدآور رہنما رام نائک کو ہرایا تھا، سال 2014 میں پی جے پی کے گوپال شیٹی نے کانگریس کے سنجے نروپم کو ہرایا تھا۔ ارمیلا کے میدان میں اترنے سے بی جے پی کافی پریشان ہے۔

ارمیلا کے چناوی میدان میں اترنے کے بعد کانگریس کارکنان میں زبردست جوش دکھائی دے رہا ہے، اسی لئے بی جے پی نے بوکھلاہٹ میں جھوٹی تشہیر کر کے ارمیلا کی کردار کشی کرنے کی کوشش کی، جو بی جے پی کے اوپر الٹی پڑ گئی۔ ارمیلا کے چناوی میدان میں اترنے سے ممبئی کی دیگر سیٹوں پر بھی اثر پڑنے والا ہے، جس کا سیدھا فائدہ کانگریس کو ہو گا۔ یہ پہلا موقع نہیں ہے جب کانگریس کی جانب سے ممبئی میں کوئی فلمی ہستی چناوی میدان میں اتری ہے، اس سے پہلے سنیل دت جہاں کانگریس کے ٹکٹ پر چناؤ لڑتے رہے ہیں وہیں گووندا بھی ممبئی سے کانگریس کے ٹکٹ پر کامیاب ہو چکے ہیں۔