یوپی کی ایٹاوہ سیٹ پر دلچسپ مقابلہ، بی جے پی کے رکن پارلیمنٹ کے خلاف بیوی نے آزاد امیدوار کے طور پر داخل کیا پرچہ

لوک سبھا انتخابات میں اتر پردیش کی ایٹاوہ سیٹ سے بی جے پی کے امیدوار اور موجودہ رکن پارلیمنٹ رام شنکر کٹھیریا کے لئے عجیب و غریب صورت حال پیدا ہو گئی ہے۔ دراصل، ان کی بیوی مردولا کٹھیریا نے بھی اپنے شوہر کے خلاف آزاد امیدوار کے طور پر کاغذات نامزدگی داخل کر دئے ہیں، جس سے یہاں مقابلہ دلچسپ ہو گیا ہے۔

رام شنکر کٹھیریا نے بدھ کو ایٹاوہ لوک سبھا سیٹ سے اپنے کاغذات نامزدگی داخل کئے۔ اس کے بعد غیر متوقع واقعہ میں ان کی بیوی مردولا کٹھیریا نے بھی ایس سیٹ سے آزاد امیدوار کے طور پر پرچہ داخل کر دیا۔ غورطلب ہے کہ مردولا کٹھیریا نے 2019 میں بھی اپنے شوہر کے خلاف پرچہ داخل کیا تھا لیکن بعد میں انہوں نے اپنا پرچہ واپس لے لیا تھا۔

پرچہ نامزدگی داخل کرنے کے بعد صحافیوں سے بات کرتے ہوئے مردولا کٹھیریا نے کہا، ’’ملک میں جمہوریت ہے۔ یہاں ہر کوئی آزاد ہے، یہاں کوئی بھی الیکشن لڑ سکتا ہے۔ میں اپنے شوہر کے خلاف کھڑی ہوں اور وہ میرے خلاف کھڑے ہیں۔ یہ الیکشن ہے اور یہاں ہر کوئی الیکشن لڑنے کے لئے آزاد ہے۔‘‘

جب ان سے پوچھا گیا کہ کیا وہ اس مرتبہ بھی اپنا پرچہ واپس لے لیں گی، تو انہوں نے جواب دیا کہ انہوں نے میدان سے ہٹنے کے لئے پرچہ داخل نہیں کیا۔ خیال رہے کہ رام شنکر کٹھیریا تیسری مربہ بی جے پی کے امیدوار کے طور پر میدان میں اتر رہے ہیں۔ وہ مودی حکومت میں مرکزی وزیر بھی رہ چکے ہیں۔