حراست میں موت کے معاملے میں بیک فٹ پر یوگی حکومت! 11 پولیس اہلکار معطل، مفرور اہلکاروں کی تلاش جاری

لکھنؤ: اتر پردیش میں یوگی حکومت کی پولیس ایک بار پھر سوالوں کے گھیرے میں ہے۔ جو پولیس عوام کو تحفظ اور اعتماد فراہم کرنے کا حلف لیتی ہے، وہی پولیس اتر پردیش میں عوام پر من مانی کرتے ہوئے دیکھی جا سکتی ہے۔ تازہ معاملہ کانپور کا ہے، جہاں ایک تاجر کی پولیس حراست میں موت ہو گئی۔ جس کے بعد ہنگامہ آرائی ہو رہی ہے۔

اس معاملے میں پولیس اہلکاروں کے خلاف قتل کا مقدمہ درج کیا گیا ہے اور معاملے سے متعلق ایس او جی انچارج پرشانت گوتم کو گرفتار کر لیا گیا ہے۔ اتر پردیش کے انسانی حقوق کمیشن نے اس معاملے کا نوٹس لیا ہے اور اب تک 11 پولیس اہلکاروں کو معطل کیا جا چکا ہے۔ ساتھ ہی محکمہ پولیس نے مفرور پولیس اہلکاروں کی گرفتاری کے لیے 6 ٹیمیں تشکیل دی ہیں۔

خیال رہے کہ 12 دسمبر کو شیولی پولیس نے بلونت سنگھ نامی شخص کو ڈکیتی کے شبہ میں گرفتار کیا اور اسے تھانے لے گئی۔ اہل خانہ کا الزام ہے کہ پولس نے گرفتار کیے گئے بلونت کو حراست میں مارا پیٹا، جس کے بعد اس کی موت ہو گئی۔ ہلاکت کے بعد مشتعل اہل خانہ نے انتظامیہ کے خلاف محاذ کھول دیا۔ اعلیٰ حکام نے سخت کارروائی کی یقین دہانی کرائی اور لاش کی آخری رسومات ادا کرا دی گئیں۔