یوپی: مرزا پور میں دردناک سڑک حادثہ، ٹرک نے ٹریکٹر کو ماری زوردار ٹکر، 10 مزدور ہلاک

اتر پردیش کے مرزا پور میں جمعرات کی دیر رات ایک دردناک حادثہ پیش آیا ہے۔ بھدوہی ضلع سے بنارس جانے والے 13 لوگوں کو لے کر آر ہے ایک ٹریکٹر کو پیچھے سے بے قابو ٹرک نے زوردار ٹکر مار دی۔ اس حادثہ میں 10 افراد کی موت ہوگئی جبکہ 3 لوگ شدید طور پر زخمی ہیں۔ یہ حادثہ مرزا پور-وارانسی سرحد پر کچھواں اور مرزا مراد کے درمیان جی ٹی روڈ پر ہوا۔ اطلاع ملتے ہی ایس پی ابھینندن اور دیگر افسران فوراً موقع پر پہنچے اور راحت و بچاؤ کام شروع کرتے ہوئے زخمیوں کو اسپتال میں داخل کرایا۔ معاملے میں ایف آئی آر درج کرکے پولیس آگے کی کارروائی کر رہی ہے۔

مہلوکین کی شناخت بھانو پرتاپ (25 سال)، وکاس کمار (20 سال)، انل کمار (35 سال)، سورج کمار (22 سال)، سنوہر (25 سال)، راکیش کمار (25 سال)، پریم کمار (40 سال)، راہل کمار عرف ٹلّو (26 سال)، نتن کمار (22 سال)، روشن کمار (17 سال) کے طور پر کی گئی ہے۔ زخمیوں میں آکاش کمار (18 سال)، جمنی (26 سال) اور اجئے سروج (50 سال) کے نام شامل ہیں۔

تھانہ کچھواں پولیس کے ذریعہ مہلوکین کی لاش کو قبضہ میں لے کر مورچری بھیج دیا گیا ہے جبکہ حادثہ میں زخمی ہوئے لوگوں کا علاج ٹراما سنٹر (بی ایچ یو) وارانسی میں چل رہا ہے۔ کچھوا تھانہ نے اس حادثے کی ایف آئی آر درج کی ہے۔

پولیس کے افسر نے حادثہ کے سلسلے میں بتایا کہ دیر رات ہمیں اطلاع ملی کہ ایک بے قابو ٹرک نے ٹریکٹر کو ٹکر مار دی۔ حادثہ کی اطلاع ملنے کے بعد ہم لوگوں نے موقع پر پہنچ کر راحت و بچاؤ کام شروع کیا۔ حادثہ کے دوران جائے وقوع پر ہی سبھی 10 لوگوں کی موت ہو گئی تھی۔ بتایا جاتا ہے کہ حادثہ کا شکار ہوئے سبھی 13 لوگ بھدوہی ضلع میں مزدوری کا کام کرتے تھے۔