یوپی انتخابات: راج ناتھ سنگھ کی ریلی میں روزگار کے لئے احتجاج، نوجوانوں نے ظاہر کی ناراضگی

گونڈہ: اترپردیش میں اسمبلی انتخابات کے دوران سیاسی سرگرمیاں اپنے عروج پر ہیں۔ ایک جانب جہاں حزب اختلاف کی جماعتیں عوام سے خوش حالی کے وعدے کر رہی ہیں وہیں دوسری طرف بی جے پی کو، جوکہ گزشتہ 5 سالوں سے برسراقتدار ہے، کئی مسائل پر عوام کی ناراضگی برداشت کرنا پڑ رہی ہے۔

بی جے پی کے اسٹار تشہیر کار، ریاست کے سابق وزیر اعلیٰ اور موجودہ وزیر دفاع راج ناتھ سنگھ کی گونڈہ میں منعقدہ ریلی میں بھی نوجوانوں کی ناراضگی ظاہر ہوئی، جب انہوں نے نعرے بازی شروع کر دی۔

راج ناتھ سنگھ کی گونڈہ میں منعقدہ ریلی میں پہنچنے والے نوجوانوں کی ناراضگی بھی وزارت دفاع سے ہی تھی۔ دراصل وہ فوج کی بھرتی شروع کئے جانے کا مطالبہ کر رہے تھے۔ اس موقع پر حالات قابو سے باہر جاتے دیکھ راج ناتھ سنگھ نے جیسے تیسے نوجوانوں کو سنبھالا اور انہیں سمجھا کر پر سکون کیا۔ بعد میں ان کی گزارش پر بھیڑ سے ’بھارت ماتا کی جے‘ کا نعرے گونجا اور بھیڑ میں کھڑے تمام لوگ مسکرانے لگے۔

یہ وقعہ عین اس وقت پیش آیا جب وزیر دفاع راج ناتھ سنگھ اپنی تقریر شروع کرنے جا رہے تھے۔ روزگار کی تلاش میں کھڑے نوجوانوں نے ’فوج کی بھرتی شروع کرو‘، ’ہماری مانگیں پوری کرو‘ کے نعرے لگائے۔ اس پر راج ناتھ سنگھ نے انہیں سمجھایا کہ فکر نہ کریں بھرتی جلد شروع ہوگی۔ انہوں نے کہا ’’آپ کی پریشانی ہماری بھی ہے، کورونا وائرس کے سبب کچھ مشکلات آئی ہیں، لیکن جلد بھرتی کا عمل شروع ہوگا۔‘‘

غور طلب ہے کہ یوپی میں سات مراحل میں انتخاب ہو رہے ہیں۔ اس میں یوپی میں آج تیسرے مرحلہ کی پولنگ ہو رہی ہے جبکہ پنجاب کی تمام 117 سیٹوں پر ووٹ ڈالے جا رہے ہیں۔