یوپی انتخاب: راجبھر کی پارٹی سے انتخاب لڑیں گے مختار انصاری، عدالت سے مل گئی اجازت

اتر پردیش کی باندہ جیل میں بند زور آور رکن اسمبلی مختار انصاری جیل سے ہی سہیل دیو بھارتیہ سماج پارٹی (ایس بی ایس پی) کے انتخابی نشان پر مئو صدر سیٹ سے اسمبلی انتخاب لڑیں گے۔ اس کے لیے تمام کاغذی کارروائی کو پورا کر عدالت سے اجازت مانگی تھی تھی جو مل گئی ہے۔ اب مختار جیل سے ہی نامزدگی کا عمل پورا کریں گے۔

مختار انصاری کے وکیل داروغہ سنگھ نے تصدیق کرتے ہوئے کہا کہ انھوں نے خصوصی جج (ایم پی/ایم ایل اے) کی عدالت کے سامنے ایک عرضی پیش کی تھی جس میں مختار کے وکیل، نوٹری وکیل، تجویز کنندگان اور فوٹوگرافر کو ان کے دستخط اور دیگر کاغذی کارروائی مکمل کرنے کے لیے باندہ جیل میں ان سے ملنے کی اجازت دینے کا مطالبہ کیا گیا تھا۔

وکیل نے بتایا کہ مئو صدر سیٹ سے نامزدگی داخل کرنے کی کارروائیوں کو لے کر عدالت نے عرضی کو منظور کر لیا ہے۔ انھوں نے کہا کہ ایس بی ایس پی نے مئو صدر سیٹ سے اپنے ٹکٹ پر مختار کو اتارنے کا فیصلہ کیا ہے۔ عدالت کے سامنے پیش عرضی کےس اتھ پارٹی کا نشان ’چھڑی‘ اور دیگر سبھی ضروری دستاویزات منسلک کیے گئے ہیں۔

مختار انصاری 1996 میں مئو صدر اسمبلی سیٹ سے بہوجن سماج پارٹی کے رکن کی شکل میں کامیاب ہوئے تھے۔ تب سے انھوں نے لگاتار سبھی انتخابات میں جیت حاصل کی ہے اور یہ چھٹی بار ہوگا جب وہ اس سیٹ سے انتخاب لڑ رہے ہیں۔ ان کی پارتی ’قومی ایکتا دل‘ کا سال 2017 کے اسمبلی انتخاب میں اترنے سے پہلے بی ایس پی میں انضمام کر دیا گیا تھا۔ مختار نے اس سیٹ کو برقرار رکھنے کے لیے ایس بی ایس پی کے ہی مہندر راجبھر کو ہرایا تھا۔

پولیس ریکارڈ کے مطابق مشرقی یوپی کے اس علاقہ میں مختار انصاری گروہ کے معاشی سامراج کے خلاف کارروائی میں گروہ کو تقریباً 400 کروڑ روپے کا نقصان پہنچا ہے۔ 22 دسمبر 2021 کو ان کے بیٹے کی ملکیت ضبط کی گئی تھی۔ پولیس نے عمارتوں پر بلڈوزر چلوا کر منقولہ و غیر منقولہ ملکیتوں کی ضبطی کے علاوہ رنگ داری و مچھلی کاروبار، پی ڈبلیو ڈی اور دیگر سرکاری محکموں میں ٹھیکے ہتھیانے کے ذریعہ اس گروہ کی غیر قانونی کمائی کو نشانہ بنایا ہے۔

واضح رہے کہ اس انتخاب میں مختار انصاری کو ٹکٹ دینے والی سہیل دیو بھارتیہ سماج پرٹی اکھلیش یادو کی سماجوادی پرٹی کے ساتھ اتحاد میں انتخاب لڑ رہی ہے۔ وہیں مختار کے بڑے بھائی افضل انصاری بی ایس پی سے رکن پارلیمنٹ ہیں، جب کہ ان کے دوسرے بھائی صبغۃ اللہ انصاری سماجوادی پارٹی کے ہی ٹکٹ پر غازی پور سے انتخاب لڑ رہے ہیں۔