یوپی انتخاب: کانگریس کی تیسری فہرست جاری، 89 امیدواروں میں 37 خواتین شامل

اتر پردیش اسمبلی انتخاب کے لیے کانگریس نے آج اپنے امیدواروں کی تیسری فہرست جاری کر دی ہے۔ تیسری فہرست میں 89 امیدواروں کے ناموں کا اعلان کیا گیا ہے، جن میں 37 خاتون امیدواروں کو بھی موقع ملا ہے۔ اس سے قبل بھی کانگریس نے دوسری فہرست میں 61 خواتین اور پہلی فہرست میں 50 خواتین امیدواروں کو جگہ دی تھی۔

کانگریس جنرل سکریٹری اور اتر پردیش کی پارٹی انچارج پرینکا گاندھی نے کچھ مہینے پہلے ’لڑکی ہوں، لڑ سکتی ہوں‘ مہم کی شروعات کرتے ہوئے اعلان کیا تھا کہ یوپی اسمبلی انتخاب میں کانگریس 40 فیصد ٹکٹ خواتین کو دے گی۔ اس کے بعد پارٹی نے اتر پردیش اسمبلی انتخاب کے لیے خواتین کو 40 فیصد حصہ داری دی ہے۔ ساتھ ہی پارٹی کی طرف سے نوجوانوں کو بھی ترجیح دی جا رہی ہے۔ کانگریس نے یوپی میں ریزرویشن کے ذریعہ سے 8 لاکھ ملازمتیں خواتین کو دینے کا بھی وعدہ کیا ہے۔

واضح رہے کہ کانگریس نے یوپی انتخاب کے مدنظر ریاست کے نوجوانوں کے لیے خصوصی منشور تیار کیا ہے جس میں نوجوانوں کے مستقبل کو دیکھتے ہوئے ایک مضبوط پالیسی بنائی ہے۔ اس میں کانگریس نے اتر پردیش میں 20 لاکھ سرکاری ملازمت، ہزاروں ٹیچروں کی ویکنسی کو بھرنے اور امتحان فیس کو معاف کرنے کا اعلان کیا ہے۔

اتر پردیش انتخاب کے مدنظر 7-6 فروری کو راہل گاندھی ریاست میں انتخابی جلسہ سے خطاب بھی کرنے والے ہیں۔ وہ اتر پردیش میں اپنی پارٹی کو مضبوط کرنے کی کوششوں کے تحت مقامی نوجوان لیڈروں کے ساتھ بھی گفتگو کریں گے۔ یوپی کو لے کر راہل گاندھی لگاتار کہتے رہے ہیں کہ کانگریس پارٹی نوجوانوں کے مستقبل کو لے کر فکرمند ہے، اس لیے ایک ٹھوس پالیسی بنائی گئی ہے۔