یوپی : سیکولر ووٹوں کی تقسیم سے پھر بی جے پی کی بلے بلے

اترپردیش بلدیاتی انتخابات کے نتائج سے یہ بات بالکل واضح ہو گئی ہے کہ سیکولر ووٹ پھر بری طرح منقسم ہوئے ہیں اور اس تقسیم کا سیدھا فائدہ بی جے پی کو ہوا۔ بی ایس پی جس نے پہلی مرتبہ بلدیاتی انتخابات میں حصہ لیا تھا اس کی کارکردگی بی جے پی کو چھوڑ کر دیگر جماعتوں سے بہتر رہی ہے۔ بی ایس پی کی اچھی کارکردگی کی وجہ سے بی جے پی کو ان انتخابات میں تو فائدہ ہوا ہی ہے لیکن اس سے بی ایس پی میں ایک نئی جان پڑی ہے تو یقینا اس کا فائدہ بی جے پی کو 2019کے عام انتخابات میں بھی ہوگا۔

اتر پردیش میں وزیر اعلی یوگی آدتیہ ناتھ کا یہ پہلا بڑا امتحان تھا جو انہوں نے کافی اچھے نمبروں سے پاس کر لیا ہے۔ اتر پردیش کے16 میونسپل کارپوریشن میں سے 14 پر بی جے پی نے جیت درج کی ہے۔ اس جیت سے یہ بات تو واضح ہو گئی ہے کہ ریاست میں بی جے پی کی پکڑ ڈھیلی نہیں ہوئی ہے۔

واضح رہے اتر پردیش میں حکومت کو لے کر یوگی کے کام کاج پر سوال کھڑے ہوتے رہے ہیں۔ گورکھپور کے اسپتال میں آکسیجن کی کمی کی وجہ سے بچوں کی موت کا معاملہ ہو یا پھر بجلی کی بڑھی شرحیں ہوں ہر محاذ پر بی جے پی ناکام رہی ہے۔ ان نتائج نے یہ بات واضح کر دی ہے کہ پارلیمنٹ سے لے کر پنچایت تک بی جے پی کا قبضہ ہے۔

واضح رہے 198 پالیکا انتخابات میں سے 77 پربی جے پی کو کامیابی ملی ہے جبکہ ایس پی 47 اور بی ایس پی کو 38 پرکامیابی ملی ہے اور ان دونوں کی سیٹوں کو جوڑ لیا جائے تو وہ بی جے کی سیٹوں سے زیادہ ہیں۔