یوپی انتخاب: اکھلیش اور جینت بی جے پی کا صفایا کرنے کے لیے پرعزم

یوپی میں پہلے مرحلہ کے انتخاب میں اب زیادہ وقت نہیں ہے۔ ایسے میں سبھی پارٹیوں نے اپنا زور لگا رکھا ہے۔ اسی عمل میں سماجوادی پارٹی-آر ایل ڈی اتحاد کے اہم لیڈر اکھلیش یادو اور جینت چودھری نے آج غازی آباد میں مشترکہ پریس کانفرنس کر بی جے پی کو تنقید کا نشانہ بنایا۔ اکھلیش نے کہا کہ یوپی انتخاب میں اس غازی پور بارڈر سے غازی پور تک بی جے پی کا صفایا ہوگا۔

دونوں لیڈروں نے لال پوٹلی کو ہاتھوں میں لے کر ’اَنّ سنکلپ‘ لیا۔ اکھلیش یادو نے پریس کانفرنس کے دوران کہا کہ اصل سرپرائز اتر پردیش سے نہیں بلکہ گجرت سے آئے گا۔ ان کا اشارہ اس سال کے آخر میں گجرت میں ہونے والے اسمبلی انتخاب کی طرف تھا۔ انھوں نے کہا کہ کسان بے عزت ہوئے تھے اور ان کی بہادری اور ہمت سے قانون واپس ہوئے ہیں۔ یوپی انتخاب میں اس غازی پور سے اُس غازی پور تک بی جے پی کا صفایا ہوگا۔

اکھلیش یادو نے عوام سے خطاب کرتے ہوئے کہا کہ سال 2020 میں کورونا انفیکشن کے دور میں مزدور اپنے گھروں کو پیدل ہی جانے کے لیے مجبور ہوئے۔ بہت سے مزدور تو گھر تک پہنچ ہی نہیں پائے۔ راستے میں ہی 90 سے زیادہ مزدوروں کی جان چلی گئی۔ اس دوران سماجوادی پارٹی اور آر ایل ڈی نے لوگوں کی مدد کی۔ سماجوادی پارٹی نے ایک ایک لاکھ روپے لوگوں کو مدد کے طور پر دیئے۔

اکھلیش یادو آگے کہتے ہیں کہ ہماری حکومت آئی تو سائیکل کارخانوں کو شروع کرنے کا کام کرے گی۔ اتنا ہی نہیں، ہم کھوڑا میں اسپتال اور ڈگری کالج بنوائیں گے۔ اکھلیش نے کہا کہ میٹرو کا کام نیتا جی (ملائم سنگھ یادو) نے شروع کیا تھا جسے بہتر انداز میں آگے بڑھایا جائے گا۔ انھوں نے شہر کی سہولیات، ماحولیات، صفائی کو لے کر کام کیے جانے کا بھی عزم ظاہر کیا۔ سماجوادی پارٹی حکومت شہر کو اچھا بنانے کے لیے ہر ممکن کام کرے گی۔ مودی نگر میں خصوصی ٹراما سنٹر، صاحب آباد میں بھی علاج کا انتظام حکومت کرے گی۔

اکھلیش نے عوام سے سماجوادی پارٹی اور آر ایل ڈی امیدواروں کے حق میں ووٹ ڈالنے کی اپیل بھی کی۔ انھوں نے کہا کہ کسانوں کی جیت پر انھیں مبارکباد دیتا ہوں۔ مرکزی حکومت زرعی قوانین نافذ کرنے اور ہٹانے تک کسانوں کو سمجھ نہیں سکی۔ غازی پور بارڈر پر کسانوں کی راہ میں کیلیں بچھائی گئیں، موالی غنڈہ کہا گیا لیکن اَن داتا نے پروا نہیں کی۔

راشٹریہ لوک دل کے سربراہ جینت چودھری نے کہا کہ کسان تحریک کے دوران لونی کے بی جے پی رکن اسمبلی کی کارگزاریوں کو کوئی بُھلا نہیں پائے گا۔ انھوں نے کہا کہ آج 29 جنوری ہے اور گزشتہ رات 28 جنوری سے ایک سال پہلے جو کسانوں نے دیکھا اور برداشت کیا وہ صرف ان کا نہیں بلکہ سبھی کسانوں کی بے عزتی تھی۔

جینت چودھری نے یہ بھی کہا کہ ایک طرف وہ حکومت ہے جو کسانوں کو دباتی ہے اور دوسری طرف ترقی کرنے والی حکومت ہوگی۔ اب نوجوانوں کو طے کرنا ہے کہ لاٹھی سے مارنے والی حکومت چاہیے یا پھر ترقیاتی کام کرنے والی حکومت۔ جینت چودھری نے یہ بھی کہا کہ ہمیں جناح اور اورنگ زیب سے کوئی سروکار نہیں ہے، پڑھے لکھے لوگ ہیں، ترقی اور ترقیاتی کاموں کی زبان بولتے ہیں۔ ساتھ ہی جینت چودھری نے وعدہ کیا کہ وہ غازی آباد کی امیدوں پر کھرے اتریں گے۔