یوپی: ناقص کھانے کی شکایت کرنے والے پولیس کانسٹیبل کا تبادلہ، 600 کلومیٹر دور تعینات کیا گیا

فیروز آباد: اتر پردیش میں ناقص کھانے کی شکایت کرنے والے یوپی پولیس کے کانسٹیبل کا فیروزآباد سے 600 کلومیٹر دور غازی پور میں تبادلہ کر دیا گیا ہے۔ اس کارروائی کو سپاہی کے لئے سزا قرار دیا جا رہا ہے۔ قبل ازیں، مذکورہ کانسٹیبل منوج کمار کو طویل رخصت پر بھیج دیا گیا تھا۔ خیال رہے کہ منوج کمار کی ایک ویڈیو سوشل میڈیا پر کافی وائرل ہوئی تھی، جس میں انہوں نے پولیس لائن سے ملنے والے کھانے پر سوال کھڑے کرتے ہوئے کھانے کی تھالی ہاتھ میں لے کر شاہراہ پر احتجاج کیا تھا۔

سپاہی کو ویڈیو میں یہ کہتے ہوئے سنا جا سکتا ہے کہ پولیس اہلکاروں کو 12 گھنٹے کی ڈیوٹی کے بعد ناقص کھانا پیش کیا جا رہا ہے۔ انہوں نے کہا تھا کہ ’’اس کھانے کو کتا بھی نہیں کھائے گا۔ اگر ہمارے پیٹ میں کچھ نہیں جاتا ہے، تو ہم کام کس طرح کریں گے؟‘‘

علی گڑھ ضلع کے رہائشی منوج کمار نے کہا، ’’میرے خاندان میں کل 6 ارکان ہیں، جن میں دو چھوٹے بھائی اور کنواری بہن بھی شامل ہیں۔ میرے والدین بوڑھے ہیں اور زیر علاج ہیں۔ 600 کلومیٹر سے بھی زیادہ دور ڈیوٹی پر رہ کر ان کی دیکھ بھال کرنا میرے لئے مشکل ہوگا۔ میں اپنے خاندان میں واحد کمانے والا شخص ہوں۔‘‘

منوج کمار کے ایک دوست نے، جو خود بھی پولیس فورس میں تعینات ہیں، کہا ’’یہ دیکھنا مایوس کن ہے کہ ان کے جیسے ایماندار شخص کو ایک حقیقی مسئلہ اٹھانے کی سزا دی جا رہی ہے۔ وہ ایک عاجز شخص ہے۔ اس کے دو بھائی یومیہ مزدور ہیں۔ منوج کو خود بھی تعلیم حاصل کرنے کے لئے مزدوری کرنی پڑی تھی۔‘‘

خیال رہے کہ ویڈیو وائرل ہونے کے بعد فیروز آباد میں سینئر سپرنٹنڈنٹ پولیس نے میس میں پیش کئے جانے والی کھانے کے معیار کی جانچ کے لئے سرکل آفیسرز کے لئے ایک روسٹر جاری کیا ہے۔ دوسرے اضلاع میں بھی اسی طرح کے احکامات جاری کیے گئے تھے۔