’یوپی کے بجٹ نے غریبوں، بے روزگاروں اور اقلیتوں کو مایوس کیا‘

لکھنؤ: پیس پارٹی کے قومی صدر ڈاکٹر ایوب سرجن نے بجٹ پر اپنے ردعمل میں مذکورہ تاثرات کرتے ہوئے اسے مایوس کن قرار دیا ہے۔ انہوں نے کہا کہ اتر پردیش حکومت کے ذریعہ پیش بجٹ میں جہاں غریبوں، بےروزگاروں، اقلیتوں، کسانوں و خواتین کو مایوس کیا ہے، وہیں مہنگائی پر کنٹرول کے لئے کوئی نظم نہیں۔ یہ بجٹ پوری طرح عام لوگوں کو مایوس کرنے والا ہے۔

ڈاکٹر ایوب سرجن نے کہا کہ اترپردیش کا یہ بجٹ شدید مایوس کرنے و افراط زر میں اضافہ کرنے والا ہے، اس سے مہنگائی میں مزید اضافہ ہوگا اور بجٹ میں معاشرے کے غریب، اوسط طبقہ و اقلیتوں کے لئے فائدہ پہونچانے والی کوئی اسکیم نہیں ہے۔ حکومت کی سب سے بڑی غیر حساسیت کا مظاہرہ کرتے ہوئے کورونا اوقات کے متاثرین کے لئے کسی طرح کا کوئی مالی نظم نہیں کیا۔ حکومت کے بجٹ میں بے روزگار نوجوانوں کے روزگار کو لے کر عدم قوت ارادی ہے۔ بجٹ عوام کے لئے گمراہ کرنے والا ہے۔

انہوں نے کہا کہ بجٹ میں بی جے پی حکومت کی اقلیتی مخالف شبیہ عیاں ہوئی ہے۔ بجٹ پوری طرح سرمایہ داروں کو فائدہ پہونچانے والا ہے۔ حکومت نے بجٹ میں مہنگائی پر کنٹرول کرنے کا کوئی نظم نہیں کیا ہے، اس سے بے روزگاری و غریبی میں جہاں اضافہ ہوگا ،وہیں عوام کے مسائل میں مزید اضافہ ہوگا۔ پیس پارٹی مذکورہ عوام مخالف بجٹ کی مذمت کرتی ہے۔

خیال رہے کہ اتر پردیش میں یوگی حکومت نے گزشتہ روز اپنی دوسری مدت کار کا پہلا بجٹ پیش کر دیا۔ بجٹ پر اپوزیشن پارٹیوں نے سخت تنقید کی ہے۔ سماجوادی پارٹی سربراہ اکھلیش یادو نے کہا کہ ریاست میں ترقی صرف اعداد و شمار میں ہی دکھائی دے رہے ہیں، جب کہ سچائی یہ ہے کہ نوجوان بے روزگار ہیں۔ انھوں نے کہا کہ یوگی حکومت کا ہمیشہ سے ہی دعویٰ رہا ہے کہ کسانوں کی آمدنی دوگنی کر دی جائے گی، لیکن اب تک ایسا نہیں ہو سکا۔ انھوں نے روزگار کے ایشو پر بھی حکومت پر حملہ کرتے ہوئے کہا کہ اعلانات میں تو ملازمت کے تمام دعوے کیے جاتے ہیں، لیکن حقیقت میں ایسا کہیں نہیں دکھائی دیتا۔ اکھلیش یادو نے اس پر بھی سوال اٹھایا کہ بجٹ میں بچوں کی پڑھائی کے تعلق سے کوئی اعلان نہیں کیا گیا۔

بہوجن سماج پارٹی کی سربراہ مایاوتی نے یوپی کے بجٹ کو گھسا-پٹا قرار دیا۔ انھوں نے ایک ٹوئٹ میں کہا کہ ’’یوپی حکومت کا بجٹ پہلی نظر میں وہی گھسا پٹا اور حیران کرنے والا و مفاد عامہ و عوامی فلاح میں بھی، خصوصاً ریاست میں چھائی ہوئی غریبی، بے روزگاری و بدحالی کے معاملے میں اندھے کنویں جیسا ہے، جس سے یہاں کے لوگوں کی غربت سے آزادی کی امید لگاتار ختم ہوتی جا رہی ہے۔‘‘

کانگریس کے ترجمان انشو اوستھی نے کہا کہ اتنے بجٹ یوپی حکومت پیش کر چکی، لیکن کیا نکلا۔ صرف نمبر بڑھائے گئے۔ مہنگائی اور بے روزگاری عروج پر ہے۔ کوئی بھی منصوبہ غریبوں کے فلاح کے لیے نہیں ہے۔ صرف دعوے ہوا ہوائی ہیں۔ تعلیمی سطح گرتی جا رہی ہے۔ نظامِ صحت میں پھسڈی ہے۔ صرف صنعت کاروں پر توجہ دی جا رہی ہے۔

(ان پٹ، یو این آئی)