یوپی بورڈ: 10ویں اور 12ویں کے نتائج کل ہوں گے جاری

اتر پردیش میں یوپی بورڈ کے 10ویں اور 12ویں کے امتحانات کے نتائج کل 25 اپریل 2023 کو جاری کیے جائیں گے۔ اتر پردیش ایجوکیشن کونسل کے مطابق ہائی اسکول اور انٹر کے نتائج کل دوپہر 1.30 بجے جاری کیے جائیں گے۔ نتائج بورڈ سکریٹری کے ذریعے پریاگ راج ہیڈکوارٹر میں ایک پریس کانفرنس کے دوران جاری ہوں گے۔ جیسے ہی نتائج جاری ہوں گے، طلباء بورڈ کی سرکاری ویب سائٹ upmsp.edu.in پر دیکھ سکیں گے۔

طلباء اپنا نتیجہ یوپی بورڈ کی آفیشل سائٹ upmsp.edu.in پر دیکھ سکتے ہیں۔ سب سے پہلے طلباء کو ویب سائٹ کھولنی ہوگی۔ اس کے بعد، ہوم پیج پر آپ کو یوپی بورڈ 10 ویں کا نتیجہ 2023 یا یوپی بورڈ 12 ویں کا نتیجہ 2023 لنک پر کلک کرنا ہوگا۔ اس کے بعد لاگ ان پیج کھل جائے گا، جہاں طلبہ اپنا رول نمبر اور تاریخ پیدائش درج کریں گے، جس کے بعد اسکرین پر نتیجہ کھل جائے گا۔ اگر طلباء چاہیں تو نتیجہ ڈاؤن لوڈ اور پرنٹ آؤٹ بھی لے سکتے ہیں۔

نتیجہ جاری ہونے کے بعد، طلباء اپنے امتحانی رول نمبر کی مدد سے اپنی ای مارک شیٹ ڈاؤن لوڈ کر سکیں گے۔ تاہم، طلباء کو اصل مارک شیٹ ان کے اسکول سے ہی ملے گی۔ اس سال یوپی میں ہائی اسکول اور انٹرمیڈیٹ کے امتحانات کے لیے 58,85,745 طلبہ نے رجسٹریشن کروایا تھا، جس میں دسویں کلاس کے 3116487 اور بارہویں کلاس کے 2769258 طلبا شامل ہیں۔ اب یہ تمام طلبہ اپنے رزلٹ کا بے صبری سے انتظار کر رہے ہیں۔

دوسری طرف یوپی بورڈ نے اس سال 10ویں اور 12ویں بورڈ کے امتحانات کی کاپی چیکنگ کا کام مقررہ وقت سے پہلے مکمل کرکے ایک نیا ریکارڈ بنایا ہے۔ پروگرام کے مطابق کاپیوں کی جانچ پڑتال کا عمل یکم اپریل کو مکمل ہونا تھا لیکن بورڈ نے ایک دن پہلے ہی جانچ مکمل کر لی تھی۔ بورڈ نے ہائی اسکول کے پرچوں کی 1.86 کروڑ کاپیوں کی جانچ کے لیے 89,698 ممتحن مقرر کیے تھے۔ کاپی چیکنگ کے بعد بورڈ اب ریکارڈ وقت میں نتیجہ جاری کرنے جا رہا ہے۔