اناؤ ریپ: ہائی کورٹ کے فیصلہ کے بعد بی جے پی رکن اسمبلی گرفتار

اناؤ اجتماعی عصمت دری کے ملزم کلدیپ سنگھ سینگر کو بلآخر سی بی آئی نے گرفتار کر لیا ہے۔ یہ گرفتاری الہ آباد ہائی کورٹ کے فیصلہ کے بعد عمل میں آئی ہے۔ ہائی کورٹ نے اتر پردیش حکومت کو پھٹکار لگاتے ہوئے بی جے پی رکن اسمبلی کو گرفتار کرنے کے لئے کہا تھا۔ تاہم سی بی آئی نے سینگر کو پہلے ہی حراست میں رکھا ہوا تھا۔ جمعہ کی صبح 4.30 بجے سی بی آئی نے اسے لکھنؤ واقع رہائش سے حراست میں لیا تھا۔

سی بی آئی نے اس معاملہ میں تین مختلف مقدمات درج کئے ہیں جن میں عصمت دری، قتل اور اغوار کے معاملات شامل ہیں۔ بی جے پی رکن اسمبلی کلدیپ سنگھ سینگر پر پوسکو ایکٹ کے تحت بھی تین دفعات میں مقدمہ درج کیا گیا ہے۔ قابل ذکر ہے کہ رکن اسمبلی کا بھائی اتل سنگھ سینگر پہلے ہی گرفتار ہو چکا ہے۔

جمعہ کے روز سی بی آئی کی 7 رکنی کمیٹی نے متاثرہ فریق سے پوچھ گچھ کی۔ اناؤ کے ایک ہوٹل میں یہ پوچھ گچھ کی گئی، جس میں متاثرہ، اس کے چچا اور خاندان کے دیگر فرد سے پوچھ گچھ کی گئی۔ سی بی آئی کے افسران کو ہوٹل تک مقامی پولس چھوڑنے گئی لیکن پوچھ گچھ کے دوران پولس کو گیٹ پر ہی روک دیا گیا۔

کٹھوعہ اور اناؤ عصمت دری کے معاملہ پر کانگریس کے صدر راہل گاندھی نے وزیر اعظم نریندر مودی کی خاموشی پر سوال اٹھائے ہیں۔ راہل گاندھی نے وزیر اعظم سے خطاب کرتے ہوئے کہا، ’’خواتین اور بچوں کے خلارف بڑھتے جرائم پر آپ کیا سوچتے ہیں؟ حکومت عصمت دری اور قتل کے قصورواروں کو کیوں بچا رہی ہے؟ ملک آپ کے جواب کا انتظار کر رہا ہے۔‘‘

اناؤ اجتماعی عصمت دری معاملہ میں الہ آباد ہائی کورٹ نے اپنا فیصلہ سناتے ہوئے کہا کہ ملزم کو حراست میں لینے سے کام نہیں چلے گا اسے گرفتار کیا جائے۔ عدالت عالیہ نے ریاستی حکوت سے 2 مئی تک پیش و رفت کی رپورٹ پیش کرنے کو کہا ہے۔ اس پورے معاملہ کی ہائی کورٹ کی طرف سے نگرانی کی جائے گی۔ واضح رہے کہ اس معاملہ میں ہائی کورٹ نے از خود نوٹس لیتے ہوئے سماعت کی ہے۔

عصمت دری کے معاملات میں گھری بی جے پی کی مرکزی اور ریاستی حکومت کی ناقص کارکردگی کے سوال پر راج ناتھ سنگھ نے بلآخر خاموشی توڑ دی ہے۔ راج ناتھ سنگھ نے ’آج تک‘ نیوز چینل سے خصوصی بات کرتے ہوئے کہا کہ یوگی حکومت بہتر کام کر رہی ہے اور بدعنوانی کے کے حوالہ سے زیرو ٹالرینس کی پالیسی کو اختیار کیا گیا ہے۔ اناؤ عصمت دری کے ملزم کلدیپ سینگر کے حوالہ سے انہوں نے کہا کہ مجرم کوئی بھی ہو بخشا نہیں جائے گا۔ یوگی حکومت کو کلین چٹ دیتے ہوئے راج ناتھ سنگھ نے کہا کہ بطور وزیر اعلیٰ یوگی آدتیہ ناتھ بہتر اور پوری ایمانداری کے ساتھ کام کر رہے ہیں۔

کانگریس پارٹی کی اپیل پر دیر رات انڈیا گیٹ پر نکالے گئے کینڈل مارچ کے چند گھنٹوں بعد ہی اناؤ عصمت دری کے ملزم بی جے پی کے رکن اسمبلی کلدپ سنگھ سینگر کو سی بی آئی نے حراست میں لے لیا۔ اطلاعات کے مطابق اناؤ کے بانگر مئو سے رکن اسمبلی کلدیپ سنگھ سینگر کو علی الصبح 4.30 بجے لکھنؤ واقع ان کی رہائش گاہ سے حراست میں لیا گیا۔

غورطلب ہے کہ مرکزی حکومت نے ریاستی حکومت کی سفارش منظور کرتے ہوئے جمعرات کی شام اس معاملہ کی تفتیش مرکزی تفتیشی ایجنسی(سی بی آئی) سے کرانے کا حکم جاری کیا تھا۔ قبل ازیں ہائی کورٹ کی پھٹکار کے بعد پولس نے ملزم رکن اسمبلی کلدپ سنگھ سینگر کے خلاف مقدمہ درج کیا تھا۔

عصمت دری معاملہ میں ملزم رکن اسمبلی کلدیپ سنگھ سینگر کے خلاف اناؤ کے ماکھی تھانے میں پولس نے 12 اپریل کو ایف آئی آر درج کی تھی۔ سینگر کے خلاف آئی پی سی کی دفعات 363، 366، 376 اور پوسکو ایکٹ سمیت دیگر کئی دفعات میں مقدمہ درج کیا گیا ہے۔

جمعرت یعنی 12 اپریل کو اس معاملہ کی سماعت الہ آباد ہائی کورٹ میں ہوئی تھی۔ ہائی کورٹ نے معاملہ کا از خود نوٹس لیتے ہوئے سماعت کی اور ریاستی حکومت سے سخت لہجہ میں پوچھا کہ آخر اس معاملہ میں اب تک ملزم رکن اسمبلی کو گرفتار کیوں نہیں کیا گیا۔ اس پر ریاستی حکومت نے عدالت عالیہ سے کہا کہ ثبوت پورے نہیں ہیں۔ معاملہ کی سماعت پوری ہونے کے بعد ہائی کورٹ نے اپنا فیصلہ محفوظ رکھا ہے اور آج دوپہر 2 بجے فیصلہ آنے کی امید ہے۔

کلدیپ سنگھ سینگر کو سی بی آئی کی طرف سے حراست میں لئے جانے کے بعد اناؤ عصمت دری کی متاثرہ نے کہا ہے کہ ملزم بی جے پی رکن اسمبلی کے خلاف سخت کارروائی ہونی چاہیے۔ متاثرہ نے کہا ’’میں چاہتی ہوں کہ اس کے (کلدیپ سنگھ سینگر) خلاف سخت کارروائی ہو اور اسے اس کے کیے کی سزا دی جائے۔‘‘