امریکہ میں کورونا کے ریکارڈ ایک لاکھ 77 ہزار نئے معاملے، 3 صوبوں میں سفری ہدایات جاری

واشنگٹن: عالمی وبا کورونا وائرس (کووڈ 19) سے شدید طور پر دو چار امریکہ میں پچھلے 24 گھنٹوں کے دوران اس کے انفیکشن کے ریکارڈ 1.77 لاکھ سے زیادہ نئے معاملے سامنے آنے کے ساتھ ہی متاثرین کی تعداد 1.07 کروڑ سے تجاوز کر گئی ہے۔ یہ ایک دن میں امریکہ میں سامنے آئے کورونا کے نئے معاملوں کی اب تک کی سب سے بڑی تعداد ہے۔

امریکہ کے سبھی 50 صوبے کورونا سے بری طرح متاثر ہیں اور ہر صوبے میں کورونا کے نئے معاملوں میں مسلسل اضافہ ہو رہا ہے۔ دریں اثنا تین صوبوں میں سفر سے متعلق نئی ہدایات جاری کر دی گئی ہیں۔

امریکہ کی جان ہاپکنز یونیورسٹی کے سائنس انجینئرنگ مرکز (سی ایس ایس ای) کی جانب سے جاری کیے گئے تازہ اعدادو شمار کے مطابق امریکہ میں کورونا سے مرنے والوں کی تعداد 2,44,217 پہنچ گئی ہے جبکہ متاثرین کی تعداد 1,07,14,001 ہوگئی ہے۔

امریکہ کا نیویارک ،نیوجرسی اور کیلی فورنیا صوبہ سب سے بری طرح متاثر ہے۔ اکیلے نیویارک میں کورونا انفیکشن کی وجہ سے 33,993 لوگوں کی موت ہوئی ہے۔ نیوجرسی میں اب تک 16,522 لوگوں کی اس وبا کی وجہ سے موت ہوچکی ہے۔ کیلی فورنیا میں کووڈ- 19 سے اب تک 18,172 لوگوں کی موت ہوچکی ہے۔

ٹیکساس میں اس کی وجہ سے 19,785 لوگ اب تک اپنی جان گنوا چکے ہیں جبکہ فلوریڈا میں کووڈ- 19 سے 17,445 لوگوں کی جان گئی ہے۔ اس کے علاوہ میساچوسیٹس میں دس ہزار سے زیادہ جبکہ پینسلوینیا میں کورونا سے 9,210 لوگوں کی موت ہوئی ہے۔

ادھر، کیلی فورنیا، آرگین اور واشنگٹن صوبے میں کورونا وائرس (کووڈ-19) انفیکشن کے بڑھتے معاملوں کے پیش نظر عام شہریوں کے لئے سفر سے متعلق نئی ہدایات جاری کی گئی ہیں۔ کیلی فورنیا کے گورنر گیون نیوسوم کے دفتر نے جمعہ کو ایک بیان جاری کرکے یہ اطلاع دی۔

نئی ہدایات کے تحت لوگوں سے کسی بھی قسم کی غیر ضروری سفر نہ کرنے کی اپیل کی گئی ہے۔ ملک کے دیگر صوبوں میں آنے والے لوگوں کو لازمی طور پر 14 دنوں تک قرنطینہ میں رہنے کی صلاح دی گئی ہے۔ لوگوں سے کہا گیا ہے کہ وہ اپنے اپنے صوبوں میں ہی رہیں۔

ان تینوں صوبوں کے لوگوں کو صلاح دی گئی ہے کہ وہ صرف ضروری کام پڑھائی یا صحت سے متعلق ضرورتوں کے لئے ہی اپنے گھروں سے باہر نکلیں۔ آرگین کی گورنر کیٹ براؤن نے کہا کہ اگر کورونا وائرس کے انفیکشن کے پھیلاؤ کو ابھی قابو نہیں کیا گیا تو حالات بے حد خطرناک ہوجائیں گے۔ ان صوبوں کے اسپتال کورونا مریضوں سے بھرے پڑے ہوئے ہیں۔