مرکز کی ساری امداد بی جےپی ریاستوں کو اورمہاراشٹر کےساتھ امتیازی سلوک: کانگریس

مہاراشٹر کانگریس کے جنرل سکریٹری اور ترجمان سچن ساونت نے جمعہ کے روز کہا کہ یہ بات واضح ہے کہ مودی حکومت مہاراشٹرسے کورونا وائرس کے معاملے میں بھی امتیازی سلوک کررہی ہے۔

مسٹر ساونت نے الزام لگایا کہ مرکزی حکومت نے مہاراشٹر کو 40 ممالک سے ملنے والے امدادی سامان کی تقسیم کے لئے ریاستوں کی فہرست سے باہر رکھا ہے۔ انہوں نے کہا کہ بیرون ملک سے آنے والے امدادی سامان کو سب سے پہلے مرکز نے قبضے میں لے لیا اور جب انہوں نے امدادی سامان کی تقسیم شروع کی، تو مہاراشٹر کو چھوڑ کر بھارتیہ جنتا پارٹی (بی جے پی) کی زير اقتدار ریاستوں اتر پردیش، مدھیہ پردیش، گجرات، ہریانہ ، بہار اور دیگر کو امدادی فراہم کیا جارہا ہے۔

انہوں نے کہا کہ کانگریس پارٹی مرکزی حکومت کی اس طرح کی حرکت کی شدید مذمت کرتی ہے اور مہاراشٹر کے عوام بی جے پی اور ریاست مین حزب اختلاف کے لیڈر دیویندر فڑنویس سے اس ناانصافی پر جواب چاہتے ہیں۔

انہوں نے کہا کہ اب تک تقریبا 25 طیارے بیرونی ممالک سے امدادی سامان لے کر ملک پہنچ چکے ہیں۔ ان ممالک میں ہندنژاد بہت سے لوگ ملک میں اپنی متعلقہ ریاستوں کی مدد کرنا چاہتے ہیں۔ بین الاقوامی امداد پانے کا ریاستی حکومتوں کا حق ہے مگر یہ امداد براہ راست ریاستوں کو کیوں فراہم نہیں کی جارہی ہے؟