راجدھانی دہلی میں دن دہاڑے گولی باری، ایک ہی کنبہ کی دو خواتین ہلاک

نئی دہلی: ملک کی راجدھانی دہلی کے آر کے پورم تھانہ علاقے میں واقع امبیڈکر بستی میں اتوار کی صبح 2 درجن سے زیادہ شرپسندوں نے ایک لڑکے کو مارنے کی نیت سے کئی راؤنڈ فائرنگ کی۔ اس واقعہ نوجوان بال بال بچ گیا، مگر اس کی دو بہنوں کو گولی لگی، جنہیں واقعے کے بعد اسپتال میں داخل کرایا گیا۔ دونوں کی اسپتال میں علاج کے دوران موت ہو گئی۔

یہ معاملہ جنوب مغربی دہلی کے آر کے پورم تھانہ علاقے میں واقع امبیڈکر بستی میں پیش آیا۔ آج صبح تقریباً 3.30 بجے 2 درجن سے زیادہ بدمعاش نوجوان کو قتل کرنے کی نیت سے اس کے گھر پہنچے۔ نوجوان اور اس کے اہل خانہ کے گھر کا دروازہ نہ کھولنے پر وہ چلے گئے۔ وہ کچھ دیر بعد پھر لوٹے اور گھر کے باہر کھڑے نوجوان پر فائرنگ شروع کر دی۔ نوجوان اپنی جان بچا کر بھاگا تاہم اس کی دو بہنوں کو بدمعاشوں نے گولیاں مار کر شدید زخمی کر دیا۔ اس کے بعد حملہ آور موقع سے فرار ہو گئے۔ واقعے کے بعد زخمی خاتون کو قریبی اسپتال میں داخل کرایا گیا، جہاں علاج کے دوران دونوں کی موت ہو گئی۔ واقعے کے بعد موقع پر موجود افسران سمیت ایک درجن سے زائد پولیس اہلکار پورے معاملے کی تحقیقات میں مصروف ہیں۔

میڈیا سے بات کرتے ہوئے متاثرہ نوجوان للت نے بتایا کہ وہ اپنی ادھار کی رقم وصول کرنے کے لیے ایک نوجوان کے گھر گیا تھا۔ جب ادھار کی رقم نہیں ملی تو وہ واپس لوٹ گیا، تاہم کچھ دیر بعد 2 درجن سے زائد بدمعاش اسے ڈھونڈتے ہوئے اس کے گھر پہنچے۔ تمام بدمعاش واپس چلے گئے اور کچھ دیر بعد جب وہ گھر کے باہر کھڑا تھا تو انہوں نے اندھا دھند فائرنگ شروع کر دی۔ فائرنگ میں اس کی بہنیں کسی طرح اسے جائے وقوعہ سے بھگانے میں کامیاب ہو گئی۔ جس کے بعد مشتعل بدمعاشوں نے جان بوجھ کر اس کی دونوں بہنوں کو گولی ماری۔ ایک کو سینے میں گولی لگی ہے، جبکہ دوسری بہن کے پیٹ میں گولی لگی۔ دونوں کی اسپتال میں علاج کے دوران موت ہو گئی۔

معاملے کی تصدیق کرتے ہوئے ڈی سی پی نے کہا کہ آج صبح تقریباً 4.40 بجے پی ایس آر کے پورم میں ایک پی سی آر کال موصول ہوئی جس میں کہا گیا کہ امبیڈکر بستی میں فون کرنے والے کی بہنوں کو کچھ لوگوں نے گولی مار دی ہے۔ اس پر کارروائی کرتے ہوئے مقامی پولیس اہلکار موقع پر پہنچ گئے، جہاں پتہ چلا کہ پنکی، عمر 30، اور جیوتی، عمر 29، کو گولی لگی۔ دونوں کو صفدر جنگ اسپتال میں داخل کرایا گیا، جہاں علاج کے دوران ان کی موت ہو گئی۔ اس واقعہ میں حملہ آور مقتول کے بھائی کو قتل کرنے آئے تھے۔ پہلی نظر میں یہ معاملہ رقم کے تصفیے کا لگتا ہے۔ اس معاملے میں مناسب دفعات کے تحت مقدمہ درج کیا جا رہا ہے۔ ساتھ ہی کیس کی تفتیش بھی جا ری ہے۔

دہلی کے وزیر اعلی اروند کیجریوال نے اس واقعہ پر دکھ کا اظہار کیا ہے۔ انہوں نے کہا کہ خواتین کے اہل خانہ سے ہماری تعزیت ہے، خدا ان کی روح کو سکون عطا کرے۔ انہوں نے مزید لکھا ’’دہلی کے لوگ عدم محفوظ کا شکار ہیں، جن لوگوں کو دہلی کا امن و امان سنبھالنا ہے وہ امن و امان کو ٹھیک کرنے کے بجائے پوری دہلی حکومت پر قبضہ کرنے کی سازش کر رہے ہیں۔ آج اگر لاء اینڈ آرڈر ایل جی کی بجائے عآپ حکومت کے ہاتھ میں ہوتا تو دہلی سب سے محفوظ ہوتی۔‘‘