پونے پورش واقعہ میں فارنسک ڈپارٹمنٹ کے ایچ او ڈی سمیت دو ڈاکٹر گرفتار، ملزم کے خون کا نمونہ غائب کرنے کا الزام
پونے پورش کار حادثے میں ایک کے بعد ایک نئے انکشافات ہو رہے ہیں۔ اب پولیس نے اس معاملے میں فارنسک ڈپارٹمنٹ کے ایچ او ڈی سمیت دو ڈاکٹروں کو گرفتار کیا ہے۔
پونے حادثے کی پورش کار/ تصویر: آئی اے این ایس
پونے پورش کار ایکسیڈنٹ واقعہ میں ثبوت مٹانے کے الزام میں فارنسک ڈپارٹمنٹ کے دو ڈاکٹروں کو گرفتار کیا ہے۔ ان میں سے ایک ڈپارٹمنٹ کا ایچ او ڈی بھی ہے۔ ان پر الزام ہے کہ انہوں نے کار چلانے والے نابالغ ملزم کے خون کے نمونے کو غائب کر دیا تھا، جس کے بعد اس کے خون میں الکحل کی تصدیق نہیں ہو سکی تھی۔ نابالغ ملزم کو سب سے صبح 11 بجے میڈیکل ٹیسٹ کے لیے سسون اسپتال لے جایا گیا تھا۔ اس دوران اس کے خون کا نمونہ ایک ایسے شخص کے خون کے نمونے سے بدل دیا گیا جس نے شراب نہیں پی تھی۔
نیوز پورٹل ’آج تک‘ کے مطابق خون کا پہلا نمونہ لینے کے بعد ٹیسٹ رپورٹ میں الکوحل کی تصدیق نہیں ہوئی تھی۔ اس رپورٹ کے آنے کے بعد شکوک پیدا ہونے شروع ہوئے۔ اس کے بعد دوبارہ خون کی رپورٹ آئی تو شراب کی تصدیق ہوئی۔ اس سے پتہ چلا تھا کہ 19 مئی کو سرکاری اسپتال کے ڈاکٹروں نے نابالغ کو بچانے کے لیے خون کے نمونے کے ساتھ چھیڑ چھاڑ کی تھی۔
واضح رہے کہ ہٹ اینڈ رن کا یہ واقعہ 19 مئی کو پیش آیا تھا۔ پونے کے کلیانی نگر علاقے میں رئیل اسٹیٹ ڈیولپر وشال اگروال کے 17 سالہ بیٹے نے اپنی اسپورٹس کار پورش سے موٹر سائیکل سوار انجینئروں کو کچل دیا تھا جس سے دونوں کی موت ہوگئی تھی۔ اس واقعے کے 14 گھنٹے بعد ملزم کو کچھ شرائط کے ساتھ عدالت سے ضمانت مل گئی تھی۔ عدالت نے انہیں 15 دنوں تک ٹریفک پولیس کے ساتھ کام کرنے اور سڑک حادثات کے اثرات اور ان کے حل پر 300 الفاظ پر مشتمل مضمون لکھنے کا حکم دیا۔ حالانکہ پولیس کی تفتیش سے یہ بات سامنے آئی کہ ملزم شراب کے نشے میں تھا اور بہت تیز رفتاری سے کار چلا رہا تھا۔ نابالغ ملزم فی الحال ایک اصلاح گھر میں ہے۔
یہ بھی پڑھیں : حماس کے عسکری ونگ القسام بریگیڈ نے تل ابیب پر راکٹ برسا دیے
دریں اثنا حال ہی میں اس معاملے میں ملوث دو پولیس اہلکاروں پر لاپرواہی کا بھی الزام لگایا گیا تھا۔ یہ دونوں افسران واقعے کے بعد سب سے پہلے موقع پر پہنچے تھے لیکن انہوں نے اپنے سینئرز اور کنٹرول روم کو اس واقعے کی اطلاع نہیں دی تھی۔ یروڈا پولیس اسٹیشن کے ان دو پولیس افسران کو پونے کمشنر نے معطل کر دیا تھا۔ ان کے نام پولیس انسپکٹر راہول جگدالے اور اے پی آئی وشوناتھ ٹوڈکری ہیں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔