کرسین پریرا کو ڈرگس کیس میں ملوث کرنے والے ملزمان کی ضمانت ہو گئی، اداکارہ دبئی میں گرفتار

بالی وڈ اداکارہ کرسین پریرا کوڈرگس  کے معاملے میں پھنسانے کے الزام میں گرفتار بیکر انتھونی پال اور ان کے ساتھی راجیش بوبھٹے کو بامبے ہائی کورٹ نے ضمانت دے دی ہے۔ ان دونوں پر کرسین پریرا کو دھوکہ دینے کا الزام تھا اور کرسین پریرا کو  دبئی میں گرفتار کر لیا گیا تھا۔

انتھونی پال اور ان کے ساتھی راجیش بوبھٹے پر الزام تھا کہ انہوں نے کرسین پریرا کو ٹرافی میں چھپائی ہوئی منشیات لے جانے پر مجبور کیا۔ اس کے بعد پریرا غیر ارادی طور پر ٹرافی کو دبئی لے گئی جہاں انہیں شارجہ میں گرفتار کر لیا گیا۔

واضح رہے کہ کرسین پریرا کے علاوہ ضمانت پر رہا ہونے والے ان دونوں ملزمان نے کلیٹن روڈریگز نامی شخص کو بھی منشیات دے کر دبئی بھیجا تھا۔ یہ شخص ڈی جے کا کام کرتا تھا اور اس وقت شارجہ میں منشیات کے ایک کیس میں 25 سال کی سزا کاٹ رہا ہے۔ ایسے میں روڈریگز کے خاندان نے ہندوستانی حکومت کی مدد سے روڈریگز کی سزا کے خلاف اپیل کرنے کی جنگ لڑی ہے۔

کرسین پریرا کے  ڈرگس کیس کی سماعت کرتے ہوئے جسٹس منیش پتلے نے کل دونوں ملزمین کو ضمانت دے دی۔ عدالت نے اپنے فیصلے میں کہا کہ یہ معاملہ 500 گرام گانجہ سے متعلق ہے جو کہ بہت کم مقدار ہے۔ اس کے علاوہ پولیس نے کیس میں چارج شیٹ داخل کی ہے اور ملزمان 17 ماہ سے زیادہ عرصے سے جیل میں ہیں۔ جس کی وجہ سے اب انہیں جیل میں رکھنے کا کوئی مقصد نہیں ہے۔ اس سے قبل سیشن کورٹ نے پال کی ضمانت کی درخواست مسترد کر دی تھی جس کے بعد اس نے بامبے ہائی کورٹ سے رجوع کیا تھا۔