تنقید کرنے والے میڈیا اداروں کو پریشان کر رہی ہے مودی حکومت: امریکہ

امریکی وزارت خارجہ نے دعویٰ کیا ہے کہ ہندوستان میں مرکزی حکومت میڈیا اداروں کو تنقید کرنے کی وجہ سے پریشان کر رہی ہے۔ امریکی محکمہ خارجہ نے انسانی حقوق کی رپورٹ 2017 جاری کی ہے۔ اس رپورٹ میں کہا گیا ہے کہ ہندوستان میں حکومت پر تنقید کرنے والے میڈیا اداروں پر دباؤ بنایا جا رہا ہے۔ رپورٹ کے مطابق ’’ہندوستان میں کئی معاملات منظر عام پر آئے ہیں جن میں حکومت نے ان میڈیا اداروں کو ہراساں کیا ہے جنہوں نے ان پر تنقید کی۔‘‘

رپورٹ کا کہنا ہے کہ ’’ہندوستان کا آئین اظہار رائے کی آزادی دیتا ہے، لیکن آئین میں پریس کی آزادی کے تعلق سے صاف طور سے کچھ نہیں لکھا ہے ۔ ہندوستان کی حکومت عام طور پر پریس کی آزادی کا احترام کرتی ہے۔ لیکن 2017 میں سامنے آئے کئی معاملوں میں ایسا دیکھنے کو نہیں ملا۔‘‘

امریکی محکمہ خارجہ کی اس رپورٹ میں ان واقعات کو بھی شامل کیا گیا ہے جو ہندوستان میں پریس کی آزادی پر حملے کے طور پر دیکھے گئے ۔ ہر سال یہ رپورٹ امریکی محکمہ خارجہ کی طرف سے جاری کی جاتی ہے۔ٹرمپ انتظامیہ کی اس سالانہ رپورٹ میں دنیا کے تمام ممالک میں انسانی حقوق کی صورت حال کو بیان کیا جاتا ہے۔