ترنمول کانگریس نے ای وی ایم مشین کو ہٹانے کا دیا نعرہ

کلکوتا: وزیراعلیٰ ممتا بنرجی نے آج پارٹی کے سالانہ ریلی ’شہید دیوس‘ کے موقع پر ایک طرف جہاں لوک سبھا انتخابات میں کراری شکست کی وجہ سے پست حوصلہ ہوچکے پارٹی ورکروں کے اعتماد کو بحال کرتے ہوئے کہا کہ ترنمول کانگریس واپسی کرے گی اور عوام اب بھی پارٹی کے ساتھ ہیں، وہیں ممتا بنرجی نے ای وی ایم مشین کے خلاف مہم کا آغاز کرتے ہوئے کہا کہ ای وی ایم مشین کی موجودگی میں منصفانہ پولنگ نہیں ہوسکتی ہے۔ انہوں نے کہا کہ ای وی ایم مشین کے ذریعہ عوامی مینڈیٹ کو چرایا جا رہا ہے اس لیے بیلٹ پیپر کے سسٹم کو بحال کرنا ہوگا۔ ساتھ ہی ممتا بنرجی نے کہا کہ ترنمول کانگریس کے ورکر خوف زدہ نہیں ہونے والے ہیں۔

شاردا اور روز ویلی چٹ فنڈ گھوٹالہ پر تبصرہ کرتے ہوئے ممتا بنرجی نے کہا کہ حال ہی میں مرکزی ایجنسیاں دوبارہ سرگرم ہوگئی ہیں۔ انہوں نے کہا کہ ٹالی ووڈ کی دو مشہور شخصیات کو مرکزی ایجنسی نے طلب کرکے پوچھ تاچھ کی۔ ممتا بنرجی نے کہا کہ ای ڈی نے ٹالی ووڈ اداکار پرسونجیت اور ریتوپرنا سین سے پوچھ تاچھ کے دوران کہا کہ اگر گرفتاری سے بچنا چاہتے ہیں تو بی جے پی میں شامل ہوجائیں ورنہ آپ کا حال بھی سدیپ بندو اپادھیائے اور تاپش پال جیسا ہی کردیا جائے گا۔

ممتا بنرجی نے کہا کہ مرکزی ایجنسیوں کا سیاسی استعمال کرکے بی جے پی کیا حاصل کرنا چاہتی ہے؟ ہم انہیں کامیاب نہیں ہونے دیں گے۔ خیال رہے کہ ریتو پرسنا سین روز ویلی چٹ فنڈ گھوٹالہ میں ای ڈی کے دفتر میں سی جی او کمپلیکس میں 8 جولائی کو پیش ہوئی تھیں۔ ان سے 8 گھنٹہ تک پوچھ تاچھ کی گئی۔ اس کے علاوہ پرسونجیت سے بھی ای ڈی نے پوچھ تاچھ کی ہے۔

ممتا بنرجی نے کولکاتا سے محض 50 کلومیٹر دوری پر واقع پھاٹ پارہ میں جاری تشدد کے واقعات پر کہا کہ بی جے پی اس کے لئے ذمہ دار ہے۔ ممتا بنرجی نے کہا کہ بی جے پی کو ووٹ دینے کا مطلب ہے کہ وہ ریاست میں امن کے ماحول کو قائم نہیں رہنے دیں گے۔ انہوں نے کہا کہ بی جے پی لیڈران جان بوجھ کر بھاٹ پارہ میں ماحول خراب کر رہے ہیں۔

یوتھ کانگریس کے صدر اور ممتا بنرجی کے بھتیجے ابھیشیک بنرجی نے کہا کہ ہم نے بھلے ہی لوک سبھا انتخابات میں محض 22 سیٹوں پر کامیابی حاصل کی ہے مگر 2021 کے اسمبلی انتخابات میں 250 سے زاید سیٹوں پر کامیابی حاصل کریں گے۔

ابھیشیک بنرجی نے کہا کہ لوک سبھا انتخابات کے دوران کیا ہوا ہم سب جانتے ہیں؟ انہوں نے کہا کہ بی جے پی کی یہ جیت ای وی ایم مشین کے بدولت ہے اور ہمار مطالبہ ہے کہ ای وای ایم مشین کی جگہ پیلٹ پیپر کو واپس لایا جائے۔ انہوں نے یوتھ لیڈروں سے اپیل کی کہ ممتا بنرجی کے فلاحی اسکیموں کو لے کر عوام تک پہنچیں۔ ریاستی وزیر ٹرانسپورٹ شوبھندو ادھیکاری نے کہا کہ بنگال میں ابھی بھی ممتا بنرجی سب سے زیادہ مقبول لیڈر ہیں۔ انہوں نے کہا کہ ہم ترقیاتی کاموں کے ذریعہ عوام تک پہنچیں گے اور ایک بار پھر جیت حاصل کریں گے۔ انہوں نے کہا کہ بی جے پی بنگال کے کلچر کو نہیں جانتی ہے۔ اگر یہ لوگ بنگال کے کلچر کو جانتے تو ودیا ساگر کی مورتی کو نہیں توڑتے۔