اتر پردیش: کانگریس لیڈروں و کارکنوں کے لیے ٹریننگ کیمپ کا آغاز

لکھنؤ: یوپی کانگریس کے صدر اجے کمار للو نے جمعرات کو یہاں بتایا کہ یوپی اسمبلی انتخابات کے پیش نظر اترپردیش کانگریس نے بلاک سطح کے اپنے لیڈروں وکارکنوں کی تربیت کے لئے ٹریننگ کیمپ کے انعقاد کا فیصلہ کیا ہے۔ یکم جولائی تا 8 جولائی تک چلنے والے اس ٹریننگ کیمپ میں شرکاء کو سوشل میڈیا اور دوسری پارٹیوں کی ناکامیوں کو عوام تک کیسے پہنچانے کے طریقہ کار سے آگاہ کیا جائے گا۔اجے کمار للو کے مطابق ریاستی کانگریس کمیٹی اپنے لیڈرس اور کارکنوں کی تربیت کے لئے اسپیشل ٹریننگ کیمپ کا انعقاد کر رہی ہے۔ انہوں نے کہا کہ دو روزہ کیمپ ان کے آٹھ حلقوں میں سے 7حلقوں میں منعقد ہوگا۔

ہر ٹریننگ کیمپ میں ہر حلقے کے نائب ریاستی صدر، ریاستی جنرل سکریٹری، ریاستی سکریٹری، ضلعی صدور، شہر کے صدور و بلاک سطح کے صدور کو ٹریننگ دی جائے گی۔ پہلا ٹریننگ کیمپ الہ آباد زون میں یکم جولائی اور 2 جولائی کو منعقد کیا جائے گا۔ اس کے بعد 2 اور 3 جولائی کو سلطان پور میں، 3 اور 4 جولائی کو لکھنو میں، 4 اور 5جولائی کو متھرا میں، 5 اور 6 جولائی کو جھانسی میں 6 اور7جولائی کو غازی آباد اور آخر میں 7 اور 8 جولائی کو بریلی میں ٹریننگ کیمپ کا انعقاد کیا جائے گا۔

اجے کمار للو نے کہا کہ ٹریننگ کے پہلے دن لیڈروں سوشل میڈیا کا استعمال اس کی اہمیت اور اس کے ذریعہ پارٹی کے موقف کو عوام الناس تک کیسے پہنچائے جائے اس کے طریقہ کار کے بارے میں بتایا جائے گا۔ جبکہ دوسرے دن انہیں بی جے پی ،آر ایس ایس، ایس پی اور بی ایس پی کے حقائق کے بارے میں روشناس کرایا جائے گا، علاوہ ازیں یوگی حکومت کی ناکامیوں کے بارے میں بھی شرکاء کو آگاہ کیا جائے گا۔

اس دوران اجے کمار للو نے کہا کہ پرینکا گاندھی کا اسی مہینے لکھنو کا دورہ متوقع ہے۔ انہوں نے کہا کہ پارٹی جنرل سکریٹری کے دورے کی حتمی تاریخ کا اعلان کیا جانا ابھی باقی ہے۔ تاہم ذرائع نے بتایا کہ 2022 کے اسمبلی انتخابات کے پیش نظر پرینکا واڈرا جلد ہی ریاستی راجدھانی میں اپنا مسکن بناسکتی ہیں۔ لکھنو میں ان کے رشتہ دار و سابق کانگریس لیڈر شیلا کول کے مکان کی تجدید کاری کی جاچکی ہے۔