پنجاب میں انتخابی مہم کا آج آخری دن، سیاسی جماعتوں نے پوری طاقت جھونکی

نئی دہلی: پنجاب اسمبلی انتخابات کے دوران سیاسی ہلچل اپنے عروج پر ہے اور تمام سیاسی جماعتوں کے رہنما پوری کوشش کر رہے ہیں۔ پنجاب میں انتخابی مہم جوئی کی مدت آج یعنی جمعہ کی شام ختم ہو رہی ہے۔ ایسے میں سیاسی جماعتوں نے ووٹروں کو اپنی طرف مائل کرنے کے لئے پوری طاقت جھونک دی ہے۔

راہل گاندھی اور پرینکا گاندھی نے کانگریس کی انتخابی مہم کی ذمہ داری اپنے ہاتھ میں لے رکھی ہے۔ کانگریس کے سامنے خود کو اقتدار میں رکھنے کا چیلنج ہے، لہذا راہل اور پرینکا دونوں انتخابی مہم کے آخری دن پنجاب میں موجود ہیں۔ کانگریس جارحانہ انداز میں عام آدمی پارٹی اور اروند کیجریوال پر حملہ بول رہی ہے۔ جبکہ سابق وزیر اعظم منموہن سنگھ نے بھی ویڈیو پیغام جاری کر کے وزیر اعظم نریندر مودی پر سوال اٹھائے ہیں۔

ادھر، وزیر اعظم نریندر مودی بی جے پی اتحاد کے لیے تین جلسوں سے خطاب کر چکے ہیں۔ کیپٹن امریندر سنگھ آج اپنی نشست پر روڈ شو کریں گے۔ عام آدمی پارٹی کی بات کریں تو پارٹی کے سربراہ اور دہلی کے وزیر اعلی اروند کیجریوال بھی پنجاب میں موجود ہیں، جبکہ سکھبیر سنگھ بادل نے اکالی دل-بی ایس پی اتحاد کی طرف سے ذمہ داری سنبھال رکھی ہے۔

کانگریس کے سابق صدر راہل گاندھی نے جمعرات کو سرہند کے فتح گڑھ صاحب اور نئی اناج منڈی میں انتخابی مہم چلائی۔ وہیں، کانگریس جنرل سکریٹری پرینکا گاندھی نے پنجاب کے پٹھان کوٹ اور لدھیانہ میں کانگریس امیدواروں کی حمایت میں روڈ شو کیا۔

وزیر دفاع راج ناتھ سنگھ آج پٹیالہ میں بی جے پی کی جانب سے ریلی کریں گے اور کیپٹن امریندر سنگھ کے ساتھ انتخابی مہم چلائیں گے۔ عام آدمی پارٹی کی جانب سے دہلی کے نائب وزیر اعلیٰ منیش سسودیا انتخابی مہم کے آخری دن میدان میں اتر رہے ہیں۔ وہ امرتسر میں بائیک ریلی نکال کر عام آدمی پارٹی کے لیے ماحول بنانے کی کوشش کریں گے، جبکہ وزیر اعلیٰ اروند کیجریوال بھی روڈ شو کریں گے۔

کانگریس لیڈر راہل گاندھی نے گزشتہ روز پنجاب کے فتح گڑھ صاحب میں ایک جلسہ عام سے خطاب کرتے ہوئے کہا، ’’پنجاب میں سب سے اہم چیز امن اور بھائی چارہ ہے۔ اس سے زیادہ اہم کوئی چیز نہیں، جس دن یہ ختم ہو جائے گا، نہ روزگار ملے گا اور نہ ہی ترقی۔ پوری ریاست کو نقصان پہنچے گا۔ پنجاب کو امن اور بھائی چارے کی حفاظت کرنی ہے۔‘‘ پرینکا گاندھی نے مودی کو بڑے میاں اور کیجریوال کو چھوٹے میاں قرار دے کر نشانہ بنایا اور کہا کہ دونوں ہی سنگھ کے ملے جلے اور سپانسرڈ لیڈر ہیں۔

کانگریس کے پنجاب کے ریاستی صدر نوجوت سدھو خود اپنی سیٹ پر پورا زور لگا رہے ہیں۔ پنجاب کے وزیر اعلی چرنجیت سنگھ چنی نے نوجوت سنگھ سدھو کے ساتھ جمعرات کو امرتسر میں روڈ شو کیا۔ انتخابی مہم کے آخری دن بھی سدھو اپنی سیٹ پر روڈ شو کر کے ماحول بنانے کی کوشش کریں گے۔