ڈاکٹروں کا تعاون اور احترام کریں: اکھلیش یادو

لکھنؤ: اترپردیش کے ضلع مرادآباد میں مقامی افراد کی جانب سے طبی عملے پر حملے پر اپنی تشویش کا اظہا کرتے ہوئے سماج وادی پارٹی (ایس پی) سربراہ نے جمعرات کو اپیل کی ہے کہ کورونا وائرس کی علامات ملنے پر لوگوں کو جانچ کے لئے آگے آنا چاہیے اور ڈاکٹروں کا تعاون و عزت کرنا چاہیے۔

اکھلیش یادو نے جمعرات کو اپنے ٹوئٹ میں لکھا "کورونا بحران میں جس کے اندر بھی وائرس سے متاثر ہونے کی علامات دکھیں انہیں خود کی جانچ کے لئے آگے آنا چاہیے اور ان ڈاکٹروں کا تعاون و احترام کرنا چاہیے جو اپنی زندگی کو خطرے میں ڈال کر آپ کی جان بچا رہے ہیں۔

کورونا سے بچاو کے لئے حکومت کی پالیسیوں سے عدم اطمینان کا اظہار کرتے ہوئے اکھلیش یادو نے کہا کہ یوگی حکومت کو اس معاملے میں تحمل کا مظاہرہ کرتے ہوئے سبھی طبقات کو ساتھ لے کر چلنے کی ضرورت ہے۔ انہوں نے کہا کہ حکومت کو بھی لوگوں کو خائف کر کے نہیں بلکہ یقین میں لے کر سبھی کے ساتھ آگے بڑھنا چاہیے۔