خاتون پیلی بھیت میں جانوروں کے لئے چارہ لینے گئی تھی، شیر نے کیا حملہ

اتر پردیش کے پیلی بھیت میں جانوروں کے لیے چارہ لینے گئی ایک خاتون پر اچانک شیر نے حملہ کر دیا۔ اس کی چیخیں سن کر آس پاس کے لوگوں نے خطرے کی گھنٹی بجا دی۔ اس کے بعد شیر ڈر گیا اور موقع سے بھاگ گیا۔ خاتون کو فوری طور پر علاج کے لیے اسپتال لے جایا گیا۔ اس واقعہ سے آس پاس کے لوگوں میں خوف و ہراس پھیل گیا ہے۔

نیو ز پورٹل ’آج تک‘ پر شائع خبر کے مطابق ایک پولیس افسر نے منگل کو بتایا کہ پیلی بھیت کے ایک گاؤں کی ایک خاتون آرتی جانوروں کے لیے چارہ لینے کھیتوں میں گئی تھی۔ اس دوران اچانک گنے کے کھیت میں چھپے ایک شیر نے اس پر حملہ کر دیا۔ اس کی چیخیں سن کر قریبی لوگوں نے الارم بجایا جس سے شیر ڈر گیا اور بھاگ گیا۔ اسی دوران شیر کے حملے میں خاتون زخمی ہوگئی۔

پیلی بھیت ٹائیگر ریزرو (پی ٹی آر) کے ڈپٹی ڈائریکٹر منیش سنگھ نے کہا، آرتی کو فوری طور پر علاج کے لیے اسپتال لے جایا گیا۔ انہوں نے کہا کہ ایک مقامی دیہاتی نے جنگلات کے اہلکاروں کو بتایا کہ شیر نے آرتی پر حملہ کرنے سے پہلے کھیت میں چرنے والی ایک گائے کو شکار کرنے کی کوشش کی تھی۔ شبہ ہے کہ یہ واقعہ غالباً لکھیم پور جنگلاتی علاقہ سے شروع ہوا ہے۔ انہوں نے کہا کہ معاملے کی جانچ کی جا رہی ہے۔