کورونا وائرس پھیلانے کے شبہ میں محبوب کے ساتھ مارپیٹ کرنے والے تین ملزم گرفتار

نئی دہلی: دہلی کے بوانا علاقے کے هرویلی گاؤں میں کورونا وائرس پھیلانے کے شبہ میں دلشاد علی عرف محبوب (22) کے ساتھ بری طرح مار پیٹ کے الزام میں پولیس نے تین لوگوں کو گرفتار کیا ہے۔ پولیس نے پہلے خبر رساں ایجنسی پی ٹی آئی سے نوجوان کی موت کی بات کہی تھی، کئی نیوز پورٹلوں پر نوجوان کی موت کی خبر شائع بھی ہوئی تھی، تاہم بعد میں پولس نے بیان دیا کہ نوجوان زندہ ہے اور اس کا علاج چل رہا ہے۔

پولیس کے ایک اہلکار نے یو این آئی کو بتایا کہ محبوب کے ساتھ مارپیٹ کرنے اور دھمکی دینے کے الزام میں تمام تینوں ملزمان نوین، پرشانت اور پرمود کو گرفتار کیا گیا ہے۔ تینوں کے خلاف تعزیرات ہند کی دفعہ 341/323/506/34 کے تحت مقدمہ درج کیا گیا ہے۔

انہوں نے کہا کہ محبوب کا اب بھی لوک نائک جے پرکاش (ایل این جے پی ) اسپتال میں علاج چل رہا ہے۔ اسے کورونا آئسولیشن سینٹر میں رکھا گیا ہے جہاں اس کی حالت مستحکم ہے۔ اب تک رپورٹ کے مطابق اس میں کورونا وائرس کی علامات نہیں ہے۔ پولس افسر نے فون پر آج محبوب سے بات کی جس میں محبوب نے بتایا کہ اس کی حالت مستحکم ہے۔

واضح رہے کہ اتوار کےروز بوانا کے هریولی گاؤں میں جماعت سے گھر لوٹا ایک نوجوان بھیڑ کے حملے کا شکار ہو گیا۔ الزام ہے کہ گاؤں والوں نے نوجوان پر کورونا وائرس پھیلانے کا الزام لگا کر اسے کھیتوں میں لے جاکر بری طرح پیٹا تھا۔ اس دوران اس کی ویڈیو بنا کر وائرل بھی کر دی گئی۔ اطلاع ملنے پر موقع پر پہنچی پولیس نے زخمی محبوب کو امبیڈکر اسپتال میں داخل کرایا، جہاں سے اسے جی بی پنت اسپتال ریفر کر دیا تھا۔