عآپ اور بی جے پی میں جاری ’ایم سی ڈی تنازعہ‘ میں کون غلط اور کون صحیح؟ آئیے ڈالتے ہیں سرسری نظر

ایم سی ڈی میں میئر، ڈپٹی میئر اور اسٹینڈنگ کمیٹی کے چھ اراکین کے انتخاب کو لے کر عآپ اور بی جے پی کے درمیان ٹکراؤ کم ہوتا دکھائی نہیں دے رہا ہے۔ دونوں کے درمیان گزشتہ کچھ دنوں سے جاری تنازعہ کم ہونے کی جگہ مزید بڑھ گیا ہے۔ یہ تنازعہ کب تک چلتا رہے گا، اس کے بارے میں ابھی کچھ بھی نہیں کہا جا سکتا۔ ہو سکتا ہے یہ تنازعہ اور بھی لمبا چلے۔ آپ کو بتا دیں کہ دہلی میونسپل کارپوریشن میں تنازعہ کی اہم وجہ لیفٹیننٹ گورنر کے ذریعہ نامزد کونسلر، پریزائڈنگ افسر کی تقرری اور حج کمیٹی کی تشکیل سے دہلی کی سیاست پر پڑنے والا اثر بھی ہے۔ یہی تین نکات ایم سی ڈی میونسپل کارپوریشن کے تنازعہ کے اہم اسباب ہیں۔

دہلی میونسپل کارپوریشن کے لیے لیفٹیننٹ گورنر وی کے سکسینہ نے 10 کونسلر نامزد کیے ہیں۔ لیفٹیننٹ گورنر کے ذریعہ نامزد کونسلروں کو ایلڈرمین کہا جاتا ہے۔ اس پر عآپ کا الزام ہے کہ ایل جی نے منتخب حکومت کو کنارہ کش کرتے ہوئے بی جے پی کے کارکنان کو ایلڈرمین بنا دیا ہے۔ حالانکہ لیفٹیننٹ گورنر نے عآپ کے ذریعہ عائد کیے جا رہے الزامات کو سرے سے خارج کر دیا ہے۔

عآپ کا کہنا ہے کہ حکومت کو کنارہ کش کرتے ہوئے ایل جی نے پریزائڈنگ افسر کی تقرری کر دی ہے، جو کہ نہیں ہونا چاہیے۔ یہ پوری طرح سے غلط ہے۔ ایل جی نے عآپ کے اس الزام کو بھی غلط ٹھہرایا ہے۔ دہلی میونسپل کارپوریشن میئر، ڈپٹی میئر اور اسٹینڈنگ کمیٹی کے چیئرمین کا انتخاب کرانے کا معاملہ ایم سی ڈی تنازعہ کا دوسرا سب سے خاص مسئلہ ہے۔