عید الاضحیٰ پر جانوروں کی قربانی کا کوئی نعم البدل نہیں: مفتی اعظم ناصر الاسلام

سری نگر: جموں وکشمیر کے مفتی اعظم مفتی ناصر الاسلام نے جامعہ نظامیہ حیدر آباد کے قربانی کے متعلق فتوے کو رد کرتے ہوئے کہا ہے کہ عید الاضحیٰ کے موقع پر جانوروں کی قربانی کا کوئی نعم البدل نہیں ہے تاہم لوگوں کو تمام تر احتیاطی تدابیر پر عمل کر کے قربانی کا گوشت ہمسایوں اور رشتہ داروں میں تقسیم کرنا چاہیے۔

بتادیں کہ جامعہ نظامیہ حیدر آباد کے دارالفتاح کی طرف سے حال ہی میں جاری ایک فتوے میں کہا گیا ہے کہ اگر کوئی مسلمان عید الاضحیٰ کے موقع پر جانوروں کی قربانی سے قاصر ہے تو وہ اتنی ہی رقم غریبوں کو عطیہ کرسکتا ہے، جو کہ قربانی کا بدل ہوگا۔

مفتی اعظم مفتی ناصر الاسلام نے یو این آئی اردو کو بتایا کہ قربانی کا کوئی دوسرا متبادل نہیں ہے۔ ان کا کہنا تھا کہ 'عید الاضحیٰ پر قربانی کا کوئی متبادل نہیں ہے، ہمیں قرآن اور اسلام کے خطوط پر عمل کرنا ہے علما پر نہیں جنہوں نے دین اور اپنے آپ کو ہندوستان کے پاس گروی رکھا ہے'۔

تاہم مفتی اعظم ناصر الاسلام نے کہا کہ کورونا کے پیش نظر لوگوں کو تمام تر احتیاطی تدابیر پر عمل پیرا ہونا چاہیے۔ انہوں نے کہا کہ 'کورونا کے پیش نظر لوگوں کو چاہیے کہ وہ صحت وصفائی کا خاص خیال رکھیں اور تمام گائیڈ لائنز پر عمل کریں، سڑکوں پر خون نہ بہائیں، اوجھڑی اور چرم قربانی کو زمین میں دفن کریں اور گوشت کو زیادہ نزدیکی ہمسایوں میں ہی تقسیم کرنے کی کوشش کی جانی چاہیے'۔

شری امر ناتھ یاترا کے بارے میں موصوف مفتی اعظم نے کہا کہ 'امرناتھ جی یاترا میں ہمیں کوئی اعتراض نہیں ہے البتہ یاتریں کو پہلے کورنٹائن کیا جانا چاہیے پھر اس کو یاترا کی اجازت دی جانی چاہیے تاکہ وہ خود بھی محفوظ رہ سکے اور باقی لوگوں کا بھی تحفظ یقینی بن سکے'۔