صدر جمہوریہ کا دورہ جموں و کشمیر ہمارے لئے خوش آئند بات ہے: الطاف بخاری

سری نگر: جموں و کشمیر اپنی پارٹی کے صدر سید محمد الطاف بخاری نے صدر جمہوریہ رام ناتھ کووند کے دورہ جموں و کشمیر کو خوش آئند قرار دیتے ہوئے کہا ہے کہ موصوف صدر جمہوریہ کو اس دورے سے یہاں کے معاملات کا گہرائی سے تجزیہ کرنے کا موقعہ ملے گا۔ انہوں نے کہا کہ ہندوستان اور پاکستان کے درمیان بہتر تعلقات جموں و کشیمیر کے لئے سب سے اچھی بات ہے۔ موصوف صدر نے ان باتوں کا اظہار منگل کے روز یہاں نامہ نگاروں کے ساتھ بات کرنے کے دوران کیا۔

الطاف بخاری نے کہا کہ ’صدر جمہوریہ کی جموں و کشمیر آمد انتہائی خوش آئند بات ہے اس دورے سے انہیں یہاں کے معاملات کو گہرائی سے تجزیہ کرنے کا موقعہ ملے گا‘۔ ہندوستان اور پاکستان کے درمیان بات چیت کا سلسلہ شروع ہونے کے بارے میں پوچھے جانے والے ایک سوال کے جواب میں الطاف بخاری نے کہا کہ ’ہمارے وزیر اعظم اور وزیر خارجہ اس کے بارے میں بہتر جانتے ہیں، تاہم دونوں ہمسایہ ملکوں کے درمیان بہتر تعلقات خاص طور پر ہمارے لئے اچھی بات ہے‘۔ ان کا اسمبلی نشستوں کی سرنو حد بندی کے بارے میں پوچھے جانے پر کہا کہ ریاستی درجے کی فوری بحالی کے بعد یہاں اسمبلی انتخابات منعقد ہونے چاہئیں تاکہ جمہوریت بنیادی سطح پر استوار ہوسکے۔