کابل سے واپس آنے والے مسافروں کی آپ بیتی، ہندوستانی سفارت خانے نے نہیں کی مدد

کابل سے 150 سے زائد ہندوستانی مسافروں کی ایک ٹیم اتوار کی صبح دہلی کے اندرا گاندھی بین الاقوامی ہوائی اڈے پر بحفاظت واپس آگئی۔ افغانستان میں جاری کشیدگی اور بدامنی کے درمیان سبھی مسافروں کے بحفاظت گھر پہنچنے کے بعد وہ بہت خوش ہیں۔ کابل سے آنے والے ایک مسافر ہری تھاپا نے بتایا کہ طالبان کی طرف سے وہاں کی حکومت گرنے کے بعد افغانستان میں خوف کا ماحول ہے۔ انہوں نے کہا کہ ’’تاہم، ہمیں زیادہ پریشانی کا سامنا نہیں کرنا پڑا، کیونکہ میں کابل کے ایک ہوٹل میں ٹھہرا تھا اور کسی طرح کابل ہوائی اڈے تک پہنچنے میں کامیاب رہا‘‘۔

ہری تھاپا نے بتایا کہ ’’طالبان نے ہمیں باآسانی جانے کی اجازت دے دی، ہم ایک ہفتے تک ہوٹل میں رہے تاکہ بحفاظت ہندوستان واپس آ سکیں۔" ان کی محفوظ واپسی میں ہندوستانی سفارت خانے کے کردار کے بارے میں پوچھے جانے پر انہوں نے کہا کہ انہیں سفارت خانے سے کوئی مدد نہیں ملی۔ انہوں نے مزید کہا کہ ہم کسی طرح کابل ہوائی اڈے تک پہنچنے میں کامیاب ہو گئے۔ افغان دارالحکومت کابل کی سڑکوں پر افراتفری کا ماحول ہے۔

کابل میں ہندوستانی شہریوں کے اغوا کے حوالے سے انہوں نے کہا کہ وہ کابل میں ایسے کسی معاملے سے واقف نہیں ہیں۔ کابل میں اپنے خوفناک تجربے کو یاد کرتے ہوئے ہری تھاپا نے کہا کہ ہوائی اڈے پر افراتفری کا ماحول ہے۔ ہر شخص کسی بھی طرح افغانستان چھوڑنے کی جلدی میں ہے۔ تاہم، انہوں نے کہا کہ انہیں کابل میں طالبان کی طرف سے براہ راست دھمکی نہیں ملی۔